Infraestructuras

Medio Ambiente poñerá este venres en funcionamento as fontes ornamentais, apagadas por seguridade sanitaria pola pandemia.

Medio Ambiente poñerá este venres en funcionamento as fontes ornamentais, apagadas por seguridade sanitaria pola pandemia. Desde esta semana, tamén, a concellería procederá a desinfección das fontes de consumo humano do municipio para proceder a súa reapertura. O edil Miguel Fernández lembra que a cidadanía debe cumprir as recomendacións das autoridades sanitarias de desinfectar as mans trala utilización das fontes públicas.

A concellería de Medio Ambiente poñerá este venres en funcionamento as oito fontes ornamentais do Concello de Lugo: a da Medusa, na Avenida de Garabolos; a Cibernética, na  Fonte dos Ranchos; a dos Leóns, na Praza de Avilés; a Fonte do Rei, na praza do mesmo nome; a de Augas Férreas; a das Rás, nos xardíns de García Morato; a da Praza do Campo e a da Pinguela, na Rinconada do Miño.

Durante esta semana e previamente á súa posta en funcionamento, operarios da empresa encargada do seu mantemento realizaron todos os traballos de limpeza, tratamento e control da  calidade da auga mantendo as máximas garantías sanitarias.

O concelleiro responsable, Miguel Fernández, lembrou que “as fontes estiveron apagadas, sen auga, dende o inicio do estado de alarma ante a situación provocada pola pandemia da covid-19 como medida de prevención e atendendo as recomendacións das autoridades do ámbito sanitario, pero agora, feita de novo a consulta, podemos xa poñelas en funcionamento para goce da cidadanía”.

Consumo humano

Ademais, dende esta semana, procederase a desinfección das fontes de consumo humano e a súa reapertura. En total trátase de preto dun cento de mananciais nos que, sendo potables e cumprindo todos os requisitos de salubridade, “xa se poderán empregar de novo cumprindo as recomendacións das autoridades sanitarias de desinfectar as mans trala utilización das fontes públicas”, sostivo o concelleiro.

Estas fontes conectadas á traída pública estiveron sen subministración dende o inicio do estado de alarma ante a situación provocada pola pandemia da covid19.