As mellores promesas do voleibol español competirán en Lugo no Campionato de España de Seleccións Autonómicas
A alcaldesa de Lugo, Elena Candia, recibiu no Salón de Plenos do Concello a unha representación das seleccións autonómicas que participarán no Campionato de España de Seleccións Autonómicas (CESA) de voleibol, unha competición que se desenvolverá desde este xoves ata o domingo 28 de xuño en diferentes instalacións municipais da cidade.
Durante o acto institucional, a rexedora deu a benvida a deportistas, técnicos e responsables das distintas delegacións participantes, ao tempo que agradeceu que Lugo fose a cidade escollida para acoller un evento que reunirá ás principais promesas do voleibol estatal nas categorías infantil e cadete.
Elena Candia destacou que a competición permitirá compartir non só deporte, senón tamén experiencias e momentos de convivencia entre os participantes, confiando en que a estancia na cidade deixe unha lembranza especial para todos eles.
A alcaldesa puxo tamén en valor a relevancia dun campionato destas características, no que participarán representacións das 17 comunidades autónomas, cun total de 76 equipos, ademais das delegacións de Ceuta e Melilla nalgunhas categorías.
Os encontros disputaranse en distintas instalacións deportivas da cidade. O Pazo de Feiras e Congresos contará con nove pistas de xogo, mentres que o Pavillón Municipal de Deportes será a sede das finais e tamén do encontro internacional previsto para o venres. A competición completarase cos partidos programados nos polideportivos municipais Casa do Deporte e O Pombal.
Durante a recepción institucional, Elena Candia tamén destacou o labor dos clubs lucenses na promoción do deporte base e na formación de novos talentos. Neste sentido, subliñou o traballo desenvolvido ao longo dos anos por entidades como o Emevé, contribuíndo a consolidar Lugo como unha referencia dentro do voleibol galego e estatal.
A rexedora trasladou ademais o seu agradecemento á Federación Galega de Voleibol, encargada da organización do evento xunto coa Real Federación Española de Voleibol, así como aos clubs, persoas voluntarias e demais entidades implicadas na preparación dunha competición que situará Lugo como centro do voleibol base español durante os próximos días.