As Nogais mellorará o acceso á área recreativa da Reboleira e reforzará o emprego local con apoio da Xunta
O Concello das Nogais contará este ano con novos investimentos destinados á mellora das súas infraestruturas turísticas e ao impulso do emprego local. Entre as actuacións previstas destaca a recuperación e acondicionamento do acceso á área recreativa da Reboleira, un espazo de lecer e natureza que verá melloradas as súas condicións grazas a unha achega de 30.000 euros da Axencia de Turismo de Galicia.
A actuación enmárcase na liña de axudas autonómicas dirixidas aos concellos para a mellora de infraestruturas vinculadas ao turismo, co obxectivo de facer máis atractivos os recursos locais e favorecer a chegada de visitantes.
No ámbito laboral, o municipio beneficiarase tamén do programa Rural Activo 2026, que permitirá a contratación de cinco persoas durante nove meses a xornada completa. Esta iniciativa conta cun investimento de 91.400 euros e está orientada á realización de traballos relacionados coa prevención de incendios, a limpeza de montes, a xestión da biomasa e outras actuacións de carácter forestal.
Ademais, continúa en marcha unha nova edición do obradoiro dual de emprego Vía Künig VII, desenvolvido de forma conxunta polos concellos das Nogais, Baralla e Becerreá. O programa, financiado pola Xunta con preto de 493.000 euros, ofrece formación e experiencia laboral a 20 persoas desempregadas en especialidades vinculadas ao sector da construción.
Estes proxectos foron abordados durante unha reunión mantida entre o delegado territorial da Xunta en Lugo, Alfonso Villares, e o alcalde das Nogais, Jesús Núñez, na que analizaron as principais actuacións e investimentos autonómicos previstos no municipio.