'As nosas sagradas montañas' percorrerá as cumes de Navia
Este domingo 19 de decembro, continuando co programa de roteiros “As nosas sagradas montañas”, percorreranse as montañas de Navia guiadas nesta ocasión pola Asociación Irmandade Naviega.
O bus deixará aos participantes no Porto de Ancares (1649m), e posteriormente camiñaranse polos cumes das montañas Alto das Concas (1726m), Pina Neira (1812m), Collado do Arneiroso (1762m) ata chegar a Miravalles (1966m). Sendo a lonxitude total de ida e volta 10 Km, xa que non é circular, cunha dificultade media-baixa.
Antes de chegar ao porto de Ancares faranse paradas para ver certos elementos etnográficos como curtíns, uriceiras, carriles, e aldeas interesantes como Coro de Rao, Rao, Murias de Rao e Balouta. En función do que se pare na subida ata o punto de inicio, camiñarase máis ou menos traxecto do roteiro polos cumes das montañas. Na volta visitarase a Alzada ou Braña de Pondozarco.
Para participar no roteiro é necesario inscribirse antes do venres 17 de decembro a través do formulario https://roteirosadegalugo.wordpress.com/reserva/, cubriranse as prazas por orde de inscrición. Toda a información na bitácora dos roteiros https://roteirosadegalugo.wordpress.com/ e www.adega.gal ou chamando ao 982240299.
