As novas antenas de Gondar e Santa María Alta melloran a cobertura móbil no rural de Lugo
As antenas instaladas pola Xunta nos núcleos de Gondar e Santa María Alta para mellorar as comunicacións móbiles no rural do concello de Lugo entraron en funcionamento ao longo deste mes, segundo confirmou o delegado territorial, Javier Arias, quen avanzou tamén que a infraestrutura de San Pedro de Mera prestará servizo no mes de decembro, completando así unha rede destinada a ofrecer un sistema de telefonía móbil rápido, estable e eficaz en toda a zona rural do municipio.
As tres infraestruturas foron executadas pola Xunta a través da empresa pública Retegal, cun investimento próximo aos 700.000 euros. Arias desprazouse hoxe ata Gondar, onde no pasado mes de febreiro se asentara a torre nun terreo cedido por un veciño, co obxectivo de reforzar a cobertura móbil deste núcleo. Tras a súa instalación inicial, procedeuse á dotación do equipamento necesario, á conexión eléctrica e á tramitación da autorización correspondente perante o Goberno central.
O delegado sinalou que en San Pedro de Mera só resta culminar esta última fase administrativa para activar a antena, chamada a mellorar as comunicacións nos núcleos de Bacurín, Carricova, O Burgo, O Hospital, San Pedro de Abaixo, San Pedro de Arriba e Cabanas. Pola súa banda, a torre situada en Santa María Alta, operativa desde comezos deste mes, xa reforza a cobertura nesta localidade e nas poboacións de Locai, Marcoi, Riobó, Vilariño e Torible.
Arias explicou que a instalación de torres en diversos núcleos rurais da comunidade forma parte dunha iniciativa da Xunta destinada a complementar as accións do Estado, administración que posúe as competencias en materia de telecomunicacións.