As xovencas da Deputación de Lugo véndense na súa totalidade na poxa de Adai cun prezo medio de 3.713 euros
As 15 xovencas de raza rubia galega procedentes da Granxa Gayoso Castro, dependente da Deputación de Lugo, vendéronse na súa totalidade na CVI Poxa de Gando Vacún Selecto celebrada este sábado no recinto feiral de Adai, no concello do Corgo. Os animais acadaron un prezo medio de 3.713 euros, nunha xornada que puxo de manifesto o interese do sector gandeiro pola calidade xenética dos exemplares.
A cita contou coa participación do deputado provincial de Participación Cidadá, Iván Castro, e supuxo a última poxa do calendario anual. O rabaño provincial, criado na granxa situada en Castro Ribeiras de Lea e xestionado en colaboración coa Asociación Nacional de Criadores de Raza Rubia Galega (ACRUGA), mantén así o seu papel na mellora xenética desta raza autóctona.
Unha xovenca acadou os 5.000 euros
A cotización máis elevada correspondeu a unha xovenca de 23 meses, con destacados índices xenéticos, que foi adxudicada por 5.000 euros a unha explotación de Láncara. A mesma explotación adquiriu tamén outro animal.
Os prezos de saída situábanse nos 2.900 euros por exemplar. Só dúas xovencas se venderon por esa cantidade, mentres que o resto acadou importes de entre 3.200 e 5.000 euros.
Os animais, de entre 18 e 27 meses de idade e preñados de entre un e cinco meses, destacaban polos seus índices xenéticos e polas súas liñas xenealóxicas. As explotacións destinatarias están situadas en Monterroso, Ribadeo, O Corgo, Sarria, A Fonsagrada, Láncara, Pedrafita do Cebreiro, Triacastela e Toques, na provincia da Coruña.
As poxas de 2026 acadan unha media récord
A celebración en Adai pechou o calendario de poxas de 2026 cun balance positivo para a Granxa Gayoso Castro. Nas 14 poxas celebradas ao longo do ano, o prezo medio situouse nos 3.607 euros por animal, case 500 euros máis que en 2025.
O deputado provincial Iván Castro destacou o traballo desenvolvido no centro público de Castro Ribeiras de Lea para achegar ao sector gandeiro exemplares de elevada calidade xenética a través destes certames.
Ademais das xovencas, a feira incluíu unha exposición de animais da Deputación e a participación de dous machos procedentes de explotacións particulares. Un deles foi finalmente adxudicado por 6.000 euros, fronte aos 4.300 euros do seu prezo de saída.
A xornada concluíu cunha degustación de tenreira de raza rubia galega, que puxo o broche final a unha cita dedicada á promoción desta raza autóctona e á actividade gandeira galega.