Auxilia Lugo reforza a integración de 13 persoas con discapacidade a través dun programa de atención individualizada
Un total de 13 persoas beneficiáronse do programa de integración desenvolvido por Auxilia Lugo, unha iniciativa centrada en ofrecer atención especializada e individualizada para facilitar a inclusión das persoas con discapacidade e favorecer que poidan avanzar nos seus proxectos de vida.
O programa permitiu aos usuarios contar durante un ano cun acompañamento adaptado ás súas necesidades, co obxectivo de reforzar a súa autonomía, a súa participación social e a igualdade de oportunidades. A intervención forma parte do traballo que desenvolve Auxilia Lugo na provincia para eliminar as barreiras que dificultan a inclusión das persoas con discapacidade.
A entidade recibiu preto de 13.000 euros para levar a cabo esta iniciativa, que permitiu prestar unha atención continuada aos 13 usuarios participantes. O apoio económico contribuíu así ao desenvolvemento dun programa orientado a dar resposta ás necesidades individuais de cada persoa e a acompañala no seu proceso de integración.
A directora xeral de Promoción da Igualdade, Eloína Ingerto, visitou esta mañá Auxilia Lugo para coñecer o traballo desenvolvido pola asociación e puxo en valor o papel das entidades sociais no acompañamento a persoas que se atopan en situación de vulnerabilidade.
Durante a visita, Ingerto destacou que Auxilia Lugo é un referente consolidado na provincia na defensa da eliminación de barreiras e na promoción da igualdade de oportunidades. Tamén agradeceu o labor que realiza a asociación e a súa contribución á inclusión social das persoas con discapacidade.
A actuación de Auxilia Lugo enmárcase nunha orde de achegas da Xunta de Galicia destinada a financiar programas de atención integral a mulleres en situación de vulnerabilidade. O Goberno galego mobilizou 1,8 millóns de euros para impulsar itinerarios e programas de atención, asesoramento e acompañamento, dos que tamén se benefician vítimas de violencia de xénero, vítimas de trata e persoas con discapacidade.