Avanza a renovación da rúa Serra de Meira tras definir o seu deseño xeométrico
O deseño xeométrico para a mellora da rúa Serra de Meira, no tramo comprendido entre as rotondas de Serra de Meira e da avenida Adolfo Suárez, quedou definido dentro do marco de actuación do Plan Paradai.
A decisión foi tomada nunha reunión técnica celebrada na Delegación Territorial da Xunta en Lugo, onde participaron representantes da Administración autonómica e do Concello de Lugo.
A actualización do proxecto viuse bloqueada durante anos debido ás dificultades para compatibilizar o Plan Xeral de Ordenación Municipal cos requisitos impostos pola Confederación Hidrográfica do Miño Sil (CHMS). O organismo de conca rexeitara a construción de muros de contención na zona de servidume do dominio público hidráulico, impedindo a ampliación do vial conforme ao plan inicial.
Tras a finalización das obras realizadas polo Concello e a CHMS no leito do río Rato para mitigar o risco de inundacións, a Axencia Galega de Infraestruturas (AXI) remitiu ao Concello un documento con varias alternativas para a renovación da rúa. As propostas variaban entre unha mínima invasón da zona de servidume e unha solución que evitase por completo a ocupación desta.
A opción finalmente elixida prevé a construción dos muros de contención fóra da zona de servidume, permitindo o ensanche da vía sen interferir no dominio hídrico. Ademais, manteranse as actuais ramplas de acceso ao río para peóns e ciclistas, as prazas de aparcamento en liña na marxe esquerda do vial (oposta ao río) e as paradas de autobús nas dúcas marxes.
O delegado territorial da Xunta, Javier Arias, asegurou que este acordo permitirá “avanzar sen máis dilacións nin incertezas” na renovación da rúa Serra de Meira. Engadiu que a Xunta xa conta cunha partida orzamentaria de medio millón de euros, o que permitirá licitar a obra tan pronto como o proxecto conte con todos os informes favorables.
Unha vez rematada a redacción do proxecto, este será remitido ao Concello de Lugo para que xestione a autorización correspondente coa CHMS, garantindo as actuacións necesarias para o desenvolvemento urbanístico desta zona da cidade