Avanzan o programa do 25N que inclúe máis de 50 actividades en toda Galicia
O delegado do Goberno en Galicia, Pedro Blanco, presentou o avance dos actos que levarán a cabo a Delegación do Goberno e as catro Subdelegacións provinciais con motivo do Día Internacional da Eliminación da Violencia contra as Mulleres, que se celebra o 25 de novembro. O obxectivo, explicou, é servir de "escudo de contención diante dos que negan a violencia machista". Pedro Blanco destacou o esforzo do persoal da Delegación e das Subdelegacións por ampliar a conmemoración ao longo de todo o ano, seguindo as recomendacións do Pacto de Estado contra a Violencia de Xénero.
Subliñou a importancia de que estas actividades transcendan as datas tradicionais de novembro, pois a violencia machista "non entende de datas nin de estacións", e insistiu na responsabilidade de loitar contra esta lacra de maneira constante. O programa de actos inclúe máis de 50 actividades en toda Galicia, con accións destinadas a diversos colectivos: mocidade, forzas de seguridade, persoal xurídico e médico, a comunidade educativa e tamén as propias vítimas. Segundo Blanco, esta diversidade reflicte como a violencia de xénero é un problema transversal, presente en todas as idades e capas sociais.
Tamén destacou o foco especial nas actividades dirixidas á mocidade e á comunidade educativa, co fin de sensibilizar as novas xeracións e frear a proliferación de mensaxes machistas entre os máis novos. Os actos inclúen espazos para a reivindicación, como lecturas públicas, colocación de pancartas e minutos de silencio, así como actividades de formación e sensibilización, tales como talleres de defensa persoal, campañas en redes sociais, presentacións de libros e exposicións. Tamén se realizarán obradoiros de regueifa, co obxectivo de involucrar tanto zonas urbanas como concellos do rural.
Entre os actos centrais, este xoves, 3 de novembro, celebrarase no Liceo de Ourense unha xornada contra a explotación sexual e a trata de mulleres e nenas, coa intervención de Rocío Mora, directora da Asociación APRAMP. Ademais, na segunda quincena do mes, o MUNCYT da Coruña acollerá unha xornada sobre a violencia contra as mulleres nos conflitos armados, mentres que no Vello Cárcere de Lugo terá lugar un recital perfo-poético con creadoras galegas, coordinado por Yolanda Castaño, Premio Nacional de Poesía 2023.
As actividades principais culminarán na semana do 25N coa entrega dos recoñecementos 'Meninas' de Galicia, que este ano chegan á súa sétima edición. Estes galardóns distinguen persoas e entidades que destacan polo seu compromiso coa igualdade e contra a violencia machista. Pedro Blanco animou á cidadanía a participar nestas actividades e destacou que o programa está aberto a incorporar novas datas e localidades. O delegado finalizou afirmando: "Queremos que esta efeméride sexa un motivo de reivindicación e de apoio para todos aqueles que cremos firmemente nunha sociedade igualitaria, na que ningunha nena, moza ou muller teña que vivir con medo".