Baleira acorda por unanimidade impulsar a rehabilitación do pavillón polideportivo
A corporación municipal de Baleira acordou por unanimidade iniciar os pasos necesarios para mellorar o pavillón polideportivo municipal, unhas instalacións que presentan diversos problemas de conservación e que son empregadas habitualmente polo alumnado do CEIP Plurilingüe Concepción López Rey. A iniciativa, presentada polo BNG, recibiu o respaldo de todos os grupos no pleno celebrado o pasado 5 de agosto.
Entre as principais deficiencias sinaladas atópase o deterioro da cuberta, que está a provocar filtracións, goteiras e humidades no interior. A proposta tamén chama a atención sobre a necesidade de actuar nos vestiarios e nos baños e de reforzar o mantemento xeral do recinto.
O portavoz municipal do BNG, Tino Díaz, valorou o consenso acadado e incidiu na necesidade de que o acordo se traduza agora en actuacións concretas. Segundo defendeu, o obxectivo é garantir que tanto o alumnado como o resto das persoas usuarias dispoñan dunhas instalacións deportivas seguras e en condicións adecuadas.
Como primeiro paso, o Concello deberá promover a elaboración dunha memoria ou informe técnico que permita coñecer de forma detallada o estado do pavillón. O documento deberá recoller as deficiencias existentes, establecer as intervencións necesarias para a súa rehabilitación e realizar unha estimación do investimento que requirirían os traballos.
Desde o BNG consideran prioritario avanzar nesta análise para evitar que os danos se agraven co paso do tempo e encarezan unha futura reparación. Díaz insistiu en que, unha vez conseguido o respaldo plenario, corresponde ao goberno local iniciar a tramitación e concretar as actuacións.
O acordo inclúe ademais o estudo dunha nova infraestrutura vinculada ao colexio. Trátase dun corredor cuberto que permitiría aos nenos e nenas agardar polo transporte escolar protexidos da chuvia. A viabilidade e o custo desta actuación poderían incorporarse á mesma memoria técnica prevista para a rehabilitación do pavillón.
Unha vez determinadas as obras e o seu orzamento, a formación nacionalista aposta por procurar financiamento noutras administracións. O BNG de Baleira asegura que xa obtivo o compromiso da Vicepresidencia da Deputación de Lugo, a través do vicepresidente Efrén Castro, para realizar achegas destinadas á rehabilitación. Ao mesmo tempo, reclama que o Concello procure tamén a colaboración da Xunta de Galicia para completar os recursos necesarios.
Tino Díaz sinalou que a unanimidade acadada no pleno supón un primeiro avance, aínda que incidiu en que o seguinte paso será encargar o estudo técnico e buscar o financiamento que permita executar as melloras. O BNG asegura que fará seguimento do acordo para que a actuación se materialice e o municipio conte cun pavillón en mellores condicións.