Cultura

A vila vibrou ata a noite con cancións tradicionais, bares ateigados e unha participación masiva nunha festa para a memoria

Baleira encheuse de música, risas e confraternidade coa celebración dos IV Cantos de Taberna, unha cita organizada pola Asociación Cultural Camiño Primitivo de Baleira que converteu os establecementos hostaleiros do concello nun espazo compartido de tradición oral, amizade e participación veciñal. Foi unha desas noites pensadas para gardar na memoria, nas que cantar xuntos serviu como fío condutor dunha celebración marcada polo bo ambiente e a complicidade entre grupos e público.

Desde as 20.00 horas, o percorrido musical foi pasando polos locais de Neireo, Moneda, Marronda e o Recuncho D’Vane, cunha programación continuada que permitiu ao público gozar das actuacións en diferentes puntos da vila ao longo da noite. Nese primeiro tramo participaron Toxo Queimado en Neireo, Os do 13 en Moneda, Val de Láncara en Marronda e a Asociación Andrade no Recuncho D’Vane. Media hora máis tarde, ás 20.30 horas, tomaron o relevo The Cara-Cas en Neireo, Toxo Queimado en Moneda, a Asociación Andrade en Marronda e Airiños do Neira no Recuncho D’Vane.

A música continuou ás 21.00 horas coa presenza de Os do 13 en Neireo, Airiños do Neira en Moneda, The Cara-Cas en Marronda e Val de Láncara no Recuncho D’Vane. Ás 21.30 horas foi a quenda da Asociación Andrade en Neireo, Val de Láncara en Moneda, Toxo Queimado en Marronda e The Cara-Cas no Recuncho D’Vane. A partir das 22.00 horas, Airiños do Neira actuou en Neireo, The Cara-Cas en Moneda, Os do 13 en Marronda e Toxo Queimado no Recuncho D’Vane, pechando a noite ás 22.30 horas Val de Láncara en Neireo, a Asociación Andrade en Moneda, Airiños do Neira en Marronda e Os do 13 no Recuncho D’Vane.

Desde a organización quixeron expresar un agradecemento especial a todos os grupos participantes por poñerlle alma a cada actuación, aos bares e establecementos colaboradores pola súa acollida e, sobre todo, a todas as persoas que se achegaron a compartir cancións, risas e boa compañía, facendo dos Cantos de Taberna unha auténtica festa popular.