Baralla celebrará o seu magosto o 7 de novembro con castañas, gastronomía, música e baile
Baralla celebrará o venres 7 de novembro unha nova edición do seu magosto, unha cita gastronómica e festiva que reunirá veciñanza e visitantes arredor das castañas asadas, a música e os produtos tradicionais.
A celebración comezará ás 20:30 horas no pavillón municipal, onde as persoas asistentes poderán degustar castañas asadas, liscos, empanada e lacón asado, acompañados de viño e refrescos. A xornada tamén contará con queimada.
A música e o baile serán outros dos protagonistas da festa, coa participación de Airiños do Neira e Baralia, encargados de animar o encontro e crear un ambiente festivo durante a celebración.
O evento está organizado polo Concello de Baralla e busca manter viva a tradición do magosto como espazo de convivencia e celebración arredor da gastronomía e da cultura popular galega.