Becerreá acollerá en xullo a segunda edición do Maratón de Fútbol Sala con máis de 2.000 euros en premios
Becerreá volverá converterse nun dos epicentros do fútbol sala afeccionado coa celebración da segunda edición do Maratón de Fútbol Sala, unha cita deportiva que terá lugar os días 10, 11 e 12 de xullo no Pavillón Municipal da localidade.
A organización abriu xa o prazo de inscrición para os equipos interesados en participar nun torneo que repartirá máis de 2.000 euros en premios. O equipo campión recibirá 1.400 euros máis trofeo, mentres que o subcampión obterá 600 euros e trofeo. Ademais, haberá premios de 150 euros para o terceiro e cuarto clasificado.
A competición contará tamén con recoñecementos individuais e especiais. Así, entregarase un premio de 150 euros ao mellor equipo da comarca dos Ancares, ademais de galardóns para o mellor xogador do torneo e para o máximo goleador, este último dotado con 100 euros.
A inscrición ten un custo de 150 euros por equipo e poderá formalizarse a través da organización, que habilitou diferentes canles de contacto para facilitar os trámites. Durante as tres xornadas deportivas, os asistentes poderán desfrutar tamén de servizo de bar, sorteos e distintas actividades paralelas.
O evento conta coa colaboración da Vía Künig e do Concello de Becerreá, ademais do apoio de numerosas empresas e establecementos da comarca, que contribúen á celebración dunha cita que busca consolidarse como unha referencia do deporte afeccionado na montaña lucense.