Bustos reclama ao Goberno local de Lugo a axilización inmediata da renovación do tartán do Gregorio Pérez Rivera
O responsable de Deportes do grupo municipal socialista, Jorge Bustos, esixe ao Goberno de Candia que acelere de forma inmediata a renovación do tartán da pista de atletismo Gregorio Pérez Rivera, co obxectivo de garantir que a instalación estea plenamente operativa antes do inicio da tempada 2026-2027.
Bustos advertiu de que o atraso acumulado nas últimas semanas pon en risco un proxecto estratéxico que xa fora encamiñado polo anterior goberno, que contaba cunha partida orzamentaria de 650.000 euros e cun proxecto de execución xa finalizado. Segundo sinalou, “trátase dunha perda de tempo inaceptable”, ao considerar que non se avanzou na licitación da obra dentro dos prazos previstos.
O edil socialista explicou que a planificación inicial tiña como prioridade executar os traballos durante o verán, aproveitando a menor actividade deportiva para reducir o impacto nos clubs e permitir que o estadio chegase ao outono en condicións óptimas. Neste sentido, advertiu de que cada semana de demora compromete unha infraestrutura clave para o deporte en Lugo.
Bustos criticou ao Goberno local por “perder oportunidades e tempo valioso” e reclamou responsabilidade na xestión dun proxecto que cualifica de esencial para o futuro do atletismo na cidade. Tamén afeou a falta de impulso do novo responsable de Deportes, ao que acusou de ausencia de iniciativa e planificación.
O estadio Gregorio Pérez Rivera é a principal instalación municipal de atletismo en Lugo e a única pista homologada para a práctica competitiva na cidade, polo que a renovación do tartán resulta imprescindible para manter esa condición e garantir a actividade deportiva con plenas garantías.
O socialista lembrou ademais que a Cidade Cultural non dispón de pista homologada, polo que non pode absorber o volume de actividade que concentra o estadio, o que podería poñer en risco as competicións da próxima tempada se non se cumpren os prazos establecidos.
Antes de rematar, Bustos anunciou que solicitará por escrito ao Goberno local que proceda de maneira inmediata á redacción dos pregos de licitación para a súa posterior adxudicación, co fin de asegurar que a obra se execute na xanela temporal axeitada e co menor impacto posible para os clubs da cidade.