Cultura

Víctor Freixanes afirmou que a palabra 'Cantareiras' representa "a enerxía do pobo que fixo que a lingua galega puidese pasar de xeración en xeración"

Víctor Freixanes, presidente da Real Academia Galega, e Diego Rodríguez, académico e bibliotecario da Fundación Barrié, participaron no acto organizado pola Tenencia de Alcaldía de Lugo para engadir a palabra 'Cantareira' ao Paseo das Palabras do Ano de Lugo.

Rubén Arroxo, tenente de alcalde de Lugo, destacou a importancia desta intervención artística que se realiza cada ano na rúa Mallorca, un espazo que se converteu nun dos atractivos turísticos máis importantes da cidade. “Cada ano realizamos esta intervención artística que xa converteu a rúa Mallorca nun atractivo turístico máis de Lugo", explicou Arroxo, quen tamén subliñou o valor desta iniciativa para poñer en valor a lingua galega.

Na súa intervención, Víctor Freixanes afirmou que a palabra 'Cantareiras' representa "a enerxía do pobo que fixo que a lingua galega puidese pasar de xeración en xeración, de nais a fillas, de avoas a netas, a través desa tradición de transmisión oral". Ademais, Freixanes engadiu: "Cada vez que falamos galego, transmitimos a lingua, a ilusión de construir un país entre todos, porque a lingua é algo que nos une".

O evento contou coa intervención musical das Cantareiras d'Xanares e a presenza de estudantes dos institutos IES Muralla Romana, Ánxel Fole e Leiras Pulpeiro.

A palabra 'Cantareira' colocouse cun material duradeiro que asegura a visibilidade do texto ao longo do tempo. Ademais, cada palabra do Paseo está acompañada do ano no que foi designada pola Real Academia Galega como "palabra do ano" no Portal das Palabras.