Castro de Amarante celebrará as festas de San Bartolomeo do 21 ao 23 de agosto
A parroquia de Castro de Amarante, no concello de Antas de Ulla, celebrará do 21 ao 23 de agosto as súas tradicionais festas na honra de San Bartolomeo, cun programa que combinará actos relixiosos, música e actividades para todos os públicos.
Os festexos arrancarán o venres 21 de agosto coa celebración da I Festa das Casulas, unha cita gastronómica que estará acompañada pola actuación musical do Dúo Charada.
A programación continuará o sábado 22 de agosto cunha misa solemne seguida dunha sesión vermú amenizada pola Banda de Música da Comarca de Sarria. Durante a xornada tamén haberá pasarrúas a cargo da charanga Os Kokakolas e colchonetas gratuítas para os máis pequenos. Pola noite celebrarase unha gran verbena co Dúo Élite e DJ Marcos Fdez.
As festas rematarán o domingo 23 de agosto cunha nova misa solemne e sesión vermú, nesta ocasión coa actuación da Asociación Fiadeira. A partir das 19:00 horas terá lugar un tardeo musical amenizado polo Dúo Arco Iris.
A organización tamén ten previstos sorteos diarios ao longo das tres xornadas festivas. Ademais, o campo da festa contará con carpa para garantir o desenvolvemento das actividades independentemente das condicións meteorolóxicas.
Desde o Concello de Antas de Ulla animan á veciñanza e ás persoas visitantes a participar nestas celebracións, que contribúen a manter vivas as tradicións da parroquia e a apoiar o labor da comisión organizadora.