Castro de Rei reunirá tradición, gastronomía e vehículos clásicos este domingo na XV Expodegustación da Galiña de Mos
San Xiao de Mos, no concello de Castro de Rei, acollerá este domingo 25 de outubro unha nova edición da Expodegustación da Galiña de Mos, unha xornada dedicada á gastronomía, á tradición e á cultura popular que reunirá diferentes actividades ao longo do día. O programa contará tamén cunha concentración de vehículos clásicos, que se desenvolverá como un dos actos integrados na propia celebración.
A programación comezará pola mañá coa chegada dos participantes na concentración de coches e motos clásicos. Entre as 10.00 e as 11.00 horas terá lugar a recepción dos vehículos en Castro Ribeiras de Lea. A continuación, ás 11.00 horas, está prevista a saída cara a San Xiao de Mos, onde a caravana chegará ás 12.00 horas. Ás 12.30 horas realizarase a entrega dos premios. A actividade incluirá tamén un xantar e un agasallo para as persoas participantes, cun prezo de inscrición de 18 euros. Para participar é necesario realizar a inscrición previamente a través dos contactos indicados pola organización.
Xa en San Xiao de Mos, a XV Expodegustación terá como un dos seus principais protagonistas a Galiña de Mos, raza autóctona galega que centrará boa parte das actividades. Ás 11.30 horas está programada a XII Exposición e Concurso Comarcal da Raza Galiña de Mos, no que se entregarán premios aos mellores exemplares de galiñas. A exposición contará tamén coa actuación dunha banda de música.
A partir das 13.00 horas terá lugar a sesión vermú a cargo do Trío Rosel, que volverá actuar ás 16.00 horas para poñer música á xornada. Ás 14.00 horas chegará un dos momentos gastronómicos centrais do programa, coa degustación de manxares elaborados con Galiña de Mos.
A programación continuará pola tarde con diferentes propostas para todos os públicos. Ás 15.00 horas celebrarase unha actividade da Liga Galega de Billarda correspondente á tempada 2026/27, mentres que ás 15.30 horas haberá xogos populares organizados pola Asociación Cadaval.
A xornada rematará cunha proposta gastronómica que incluirá xantar, bebida, sobremesa e café, cun prezo de 18 euros. A organización anima a participar nunha celebración que combina a posta en valor da Galiña de Mos coa música, os xogos tradicionais, a gastronomía e a presenza de vehículos clásicos.
A XV Expodegustación está organizada polo Concello de Castro de Rei coa colaboración da Deputación de Lugo, Avimós, a Asociación de Criadores da Raza Galiña de Mos, a Asociación de Criadores e Propietarios de San Xiao de Mos, entre outras entidades.
