Castroverde dá comezo á Semana Santa cun amplo programa de actos relixiosos e culturais
Castroverde inicia a súa Semana Santa cun completo programa de actividades que se desenvolverán entre o 28 de marzo e o 5 de abril, combinando tradición relixiosa e propostas culturais pensadas para toda a veciñanza.
Os actos arrancan este sábado 28 de marzo con concertos de Abraham Cupeiro en Vilabade, previstos para as 18:00 e as 20:30 horas. A programación continúa o domingo 29 coa procesión de Ramos, que partirá ás 11:00 horas desde o Mercado Gandeiro, seguida da bendición diante da residencia e dunha misa no pavillón municipal. Esa mesma xornada volverán celebrarse actuacións musicais de Cupeiro en Vilabade.
Xa o mércores 1 de abril terá lugar ás 21:00 horas a procesión da Cofradía Virxe do Castelo, que sairá desde o albergue municipal e culminará cunha misa na igrexa parroquial. O xoves 2, durante a misa das 18:30 horas en Castroverde, celebrarase o tradicional lavatorio de pés aos nenos e nenas que recibirán a primeira comuñón este ano.
O venres 3 de abril, ás 21:00 horas, dará comezo o Vía Crucis na igrexa de Sampaio, percorrendo parte do núcleo. Finalmente, o sábado 4 celebrarase ás 20:00 horas a Vixilia Pascual en Vilabade, tras a que se porá o broche final cun encontro veciñal arredor duns petiscos no local Paco Pestana.
A Semana Santa de Castroverde consolídase así como unha cita destacada no calendario local, na que se mesturan devoción, tradición e convivencia veciñal.