Castroverde destina 3.000 euros ao club de fútbol sala para apoiar o deporte de base
O Concello de Castroverde concedeu unha subvención nominativa de 3.000 euros ao Club Castroverde Fútbol Sala para fomentar a práctica deportiva entre os nenos e nenas do municipio e favorecer o acceso ao deporte de base.
A axuda formalizouse mediante a sinatura dun convenio de colaboración entre ambas as partes, que establece que a totalidade dos fondos deberá destinarse a actuacións que beneficien directamente aos menores e ás súas familias.
Entre os posibles usos da subvención figuran a redución dos gastos que os fogares afrontan durante a tempada deportiva, a incorporación de novas prestacións e recursos e a mellora ou ampliación do equipamento deportivo e doutros servizos relacionados coa actividade do club.
Con esta achega, o Concello busca facilitar a participación dos máis novos no fútbol sala, apoiar as familias e promover hábitos de vida saudables a través do exercicio físico.
O acordo enmárcase no compromiso municipal co deporte local e co mantemento de recursos que permitan aos nenos e nenas de Castroverde gozar da práctica deportiva.