Castroverde proxectará a curtametraxe 'Mudanza', unha historia sobre o cancro e a súa aceptación
O Centro Sociocultural Paco Pestana de Castroverde acollerá o domingo 8 de novembro, ás 19:00 horas, a proxección de 'Mudanza', unha curtametraxe escrita pola paradelense Sonia Arias e dirixida por Luisje Moyano que aborda o impacto do cancro e o proceso de afrontar o diagnóstico.
A través da súa protagonista, a obra afonda nos medos, nas emocións e nas dificultades que xorden ao recibir unha noticia que transforma a vida dunha persoa. O relato propón unha reflexión sobre a maneira de asumir a enfermidade, a importancia de xestionar os sentimentos e o papel do acompañamento e da comprensión durante este proceso.
A iniciativa pretende contribuír á visibilización dunha realidade que afecta a numerosas persoas e familias, achegándose a ela desde a empatía e a sensibilidade.
A actividade, organizada polo Concello de Castroverde, estará aberta a toda a veciñanza e contará con entrada gratuíta.