Castroverde rendeu homenaxe a Manuel Lence Fernández cunha placa conmemorativa en Miranda
A parroquia de Miranda, no concello de Castroverde, acolleu este mércores 13 de agosto unha homenaxe a Manuel Lence Fernández, unha figura moi vinculada á localidade e recoñecida polo seu compromiso coa educación e co desenvolvemento da súa terra natal.
O acto, organizado polo Concello de Castroverde, reuniu a familiares, veciñanza, membros da corporación municipal e representantes da Asociación Cultural e Veciñal de Miranda. Durante a xornada descubriuse unha placa conmemorativa no antigo colexio da parroquia, un espazo que simboliza a aposta de Lence Fernández polo acceso á educación como ferramenta de progreso social.
Na homenaxe participaron, entre outros, familiares do homenaxeado, representantes do tecido asociativo local e integrantes do grupo Zuncurrundullo de Castroverde, que colaboraron no desenvolvemento do acto.
Desde o Concello destacaron a traxectoria dun home que, malia desenvolver a súa vida profesional lonxe de Miranda, mantivo sempre un forte vínculo coas súas orixes. A súa contribución permitiu crear oportunidades para numerosas xeracións de veciños e veciñas, especialmente no ámbito educativo.
A placa instalada no antigo centro escolar pretende preservar a memoria de Manuel Lence Fernández e transmitir ás futuras xeracións o recordo dunha persoa que deixou unha pegada fonda na historia da parroquia e do municipio.