Cervantes celebrará a súa I Xornada de Xogos Tradicionais cun programa para todas as idades
A ANPA do CPI de Cervantes organiza o vindeiro mércores 12 de agosto a primeira edición da Xornada de Xogos Tradicionais, unha iniciativa financiada pola Reserva da Biosfera Os Ancares Lucenses, dependente da Área de Medio Ambiente da Deputación de Lugo, e aberta á participación de público de todas as idades.
A actividade desenvolverase no polideportivo do Colexio de San Román e contará cun programa pensado para recuperar e divulgar os xogos tradicionais, ao tempo que ofrece alternativas de lecer para toda a familia.
A programación arrancará ás 11.00 horas con xogos populares, entre os que haberá carreiras de sacos, xogos de corda e outras propostas tradicionais. Entre as 12.00 e as 13.00 horas será a quenda dos xogos de madeira no pavillón.
Pola tarde, a actividade retomarase ás 16.00 horas cunha sesión de billarda. A continuación, entre as 17.00 e as 19.30 horas, os máis pequenos poderán desfrutar de inchables de auga.
A xornada rematará ás 20.00 horas coa celebración de Eclipse, poñendo o broche final a un día dedicado á convivencia, ao lecer e á recuperación dos xogos tradicionais.
Desde a organización animan á veciñanza e aos visitantes a participar nesta proposta, que busca fomentar a socialización e o coñecemento do patrimonio lúdico tradicional nun ambiente festivo e familiar.