Chega a campaña #CociñandoAMariñaLucense
#CociñandoAMariñaLucense é a nova iniciativa que pon en marcha a Mancomunidade coa colaboración da FCAM e da Xunta de Galicia. O obxectivo pasa por posicionar a comarca como referente do turismo gastronómico e por poñer en valor aos produtores, aos produtos e á gastronomía local. Trátase dunha acción de resposta á actual crise sanitaria. #CociñandoAMariñaLucense inclúe unha guía na que se poderán atopar os datos dos 240 produtores locais que hai na Mariña, de sectores como a agricultura, a gandeiría, a horta, a pesca, a avicultura, etc... e porá en marcha un concurso de vídeo receitas, que se desenvolverá do 15 de outubro ao 15 de novembro. No acto de presentación da campaña, que tivo lugar no Cenima en Foz, interviñeron o presidente da Mancomunidade, Fran Cajoto, o coordinador e creador da iniciativa, Lucas Requejo, o presidente da FCAM, José Carlos Paleo, e o delegado territorial da Xunta en Lugo, Javier Arias.
Cociñando A Mariña Lucense é unha iniciativa ecogastronómica novidosa coa que dar a coñecer os produtores e alimentos da comarca, onde a hostalería cociñará os produtos a través de vídeo receitas e onde se convidará a participar á cidadanía nun concurso de receitas de gastronomía local mariñá.
O presidente da Mancomunidade, Fran Cajoto, sinalou: “estamos ilusionados con este proxecto. Pouquiño a pouco imos poñendo pasos, xa se empezaron con outras iniciativas como a Ruta da Faba, que leva consolidada moito tempo. Non deixa de ser iso, poñer en valor produtores e produto local, tamén que perdamos o medo a indicar de onde ven o que comemos, se os pementos son de aquí, se o bonito é de Burela ou a pescada de Celeiro que se explique, porque é un valor engadido. Hai moitos produtos saborosos... e respectando aos asistentes onde mellor se come é na Mariña”. Cajoto agradeceu a colaboración da Federación de Comercio A Mariña e da Xunta de Galicia para levar adiante esta iniciativa. Tamén tivo palabras de agradecemento para Pilar García Porto, a responsable da Área de Turismo da Deputación de Lugo, que asistiu como convidada a este acto, xunto a representantes de Asociacións de Comerciantes e Hosteleiros, de produtores coma Boaga e Asoporcel, de técnicos, de concelleiros e de alcaldes da comarca.
O creador e coordinador da campaña, Lucas Requejo, dixo que “a aposta pola Ecogastronomía como piar de desenvolvemento gastronómico, ten por obxectivo reactivar a produción agroalimentaria dende a perspectiva da biodiversidade local e a produción sostible, promovendo accións que poñan en valor os nosos recursos gastronómicos para contribuír na consolidación dun turismo sostible.Con esta iniciativa queremos darlles visibilidade ao produtores agroalimentarios, a través da páxina web de amarinalucense.gal, onde se poderá poñerlles cara e descargar unha Guía de Produtores da Mariña Lucense. Tamén, dende finais de setembro a mediados de outubro de 2020 iremos dando a coñecer a todos eles nas redes sociais de A Mariña Lucense Turismo”.
Na súa intervención Requejo anunciou que “ademais, animaremos á hostalería local a que realicen as súas propias vídeo receitas cociñando os alimentos dos produtores de A Mariña Lucense. Poderanse ollar as súas elaboracións a partir do 15 de outubro nas nosas redes sociais e na lista de reprodución creada para esta fin da canle de Youtube da Mancomunidade: A Mariña Lucense Turismo. E por último, animaremos a participar nun concurso á cidadanía que poremos en marcha durante o mes de outubro e novembro, do 15 ao 15”.
Pola súa banda, o presidente da FCAM, José Carlos Paleo, subliñou que cantas máis iniciativas comarcais se organicen “mellor nos irá a todos” e contou que “a xente que ten segunda residencia na Mariña estase quedando aquí a teletraballar, algo que contribúe á desestacionalización da que tanto falamos. Temos que poñer en valor todo o que temos, iso axudaranos a todos a sobrevivir”. Paleo aludiu ao traballo que hai detrás deste proxecto: “este gran traballo que acabades de facer, que nos vai servir a moitos para comprar leitugas ou tomates en Mondoñedo, que non sabemos a quen comprarlle un tarro de mel se non está posto nun escaparate. Sobre todo á xente da hostalería que vai poder nutrirse de produtos de forma moito máis cómoda”. O presidente da Federación de Comercio A Mariña manifestou que “pola nosa parte nos poñemos a disposición de todo o mundo para seguir colaborando, porque este é un traballo de largo alcance, non hai metas, hai etapas, e esta é unha etapa real neste momento que vai servir para pasar o inverno dunha forma mellor”.
E o delegado territorial da Xunta en Lugo, Javier Arias, felicitou “á Mancomunidade da Mariña e á Federación de Comercio por este proxecto e reiterar sempre o apoio da Xunta a cantas medidas axuden a impulsar o xeodestino. Os tempos demandan un maior esforzo para remontar esta situación, e para iso este ano o goberno galego incrementou nun 12% a achega ao convenio que subscribe coa Mancomunidade para a xestión do xeodestino. Igualmente no marco do convenio asinado cos touroperadores galegos, estase traballando na posta en marcha de novas experiencias turísticas na Mariña lucense. Así mesmo a Xunta pretende que a comarca se converta nun dos territorios galegos no que se poña en marcha un plan de sustentabilidade turística”. E engadiu: como saben, eu mesmo tamén inicio unha nova andaina profesional, así que permítanme que aproveite este acto para, dende a miña responsabilidade como delegado territorial, poñerme a disposición da Mariña e do seu tecido social e empresarial e dos veciños e veciñas para traballar xuntos polo progreso e benestar desta comarca. Así que moitas grazas por invitarme e a traballar todos xuntos”.
Cociñando A Mariña Lucense é unha iniciativa que, como todas as que se levan a cabo dende a Mancomunidade, sigue a senda da filosofía do turismo Slow, experiencial e sostible. “A riqueza do territorio en produtos de calidade é incalculable, entre todos, debemos ser mais conscientes desto, sentirnos orgullosos e ser capaces de transmitirllo a todo o mundo”, apuntan desde a Mancomunidade de Concellos da Mariña Lucense.