CHL Meigas e Lóstregos proclámanse campións galegos benxamíns de hóckey liña
O Polideportivo A Carballeira acolleu o pasado 6 de xuño os play off das ligas galegas de hóckey liña nas categorías Benxamín Élite e Benxamín Ouro, unha xornada na que o CHL Meigas e o Lóstregos se proclamaron campións galegos nas súas respectivas competicións.
Na categoría Benxamín Élite, o CHL Meigas conquistou o título tras superar na final ao Morcegos HL por 5-2. O conxunto campión accedera ao encontro decisivo despois de derrotar ao CPL Brigantium por 8-2 nas semifinais. Pola súa banda, o Morcegos HL lograra a súa clasificación para a final ao vencer ao Artabriños HC Green por 10-2.
No partido polo terceiro e cuarto posto, o CPL Brigantium impúxose ao Artabriños HC Green por un axustado 6-5.
Na competición Benxamín Ouro, o título foi para o Lóstregos, que venceu na final ao Aquelarre Meigas por 6-1. Nas semifinais, o Aquelarre Meigas superara ao Artabriños HC White por 9-1, mentres que o Lóstregos derrotara ao ADC Alquimia Inline por 7-2.
O terceiro posto da categoría foi para o ADC Alquimia Inline, que venceu ao Artabriños HC White por 12-4.