Comezaron as obras de acondicionamento do Xulgado de Paz temporal de Ribadeo
Iniciaronse as obras de acondicionamento do local propiedade da Xunta situado na rúa Clemente Martínez Pasarón para albergar de forma temporal o Xulgado de Paz e que suporán “un investimento de 41.800 euros”.
Tratase dunha medida temporal porque, nun futuro, o Xulgado de Paz ribadense será emprazado na coñecida como Casa da antiga Telefónica unha vez que o Concello merque a propiedade e realice as obras necesarias.
Os xulgados de paz son servizos compartidos entre a Xunta e os concellos e ás entidades locais correspóndelles achegar e conservar os locais e ao Goberno galego dotalos de persoal.
As obras, financiadas pola Consellería de Presidencia, Administracións Públicas e Xustiza, consistirán en traballos de albanelería, fontanería e electricidade que permitan habilitar un arquivo, aseo e dúas oficinas. Deste xeito, permitirase mellorar as condicións de traballo do persoal e tamén a atención aos usuarios.
O inmoble, que pertence ao Instituto Galego de Vivenda e Solo, dispón de 62 metros catros nun novo espazo céntrico e accesible.