Conectan os paseos fluviais do Rato e do Miño para mellorar os espazos verdes e os itinerarios urbanos
As obras para unir os paseos fluviais do Rato e do Miño comezaron en Lugo, creando un itinerario continuo que favorecerá o lecer, a práctica deportiva e os desprazamentos activos da veciñanza.
O proxecto inclúe a preparación de máis de 20.000 metros cadrados, coa eliminación de vexetación en mal estado, nivelación do terreo e construción dunha senda de dous metros de ancho con pavimento estable, bordos de granito e sistemas de drenaxe.
O percorrido contará con bancos de granito, papeleiras metálicas e 17 luminarias LED para garantir a seguridade, ademais dunha integración ecolóxica que prevé a plantación de especies autóctonas como carballos, freixos, aveleiras e bidueiros, sementeira de céspede e instalación de casetas-refuxio para esquíos.
O proxecto, cun investimento de 225.000 euros achegado pola Confederación Hidrográfica Miño-Sil e cun prazo estimado de catro meses, permitirá recuperar e valorizar o patrimonio fluvial e natural da cidade, mellorando a calidade de vida e reforzando o modelo de cidade verde e sostible.
O alcalde de Lugo, Miguel Fernández, e o presidente da Confederación, José Antonio Quiroga, destacaron a importancia da colaboración institucional para facer realidade unha intervención que integra espazos naturais e fomenta o uso cidadán en condicións seguras.