Controlado o incendio forestal en Navia de Suarna que afectou a 20 hectáreas
O incendio forestal declarado na parroquia de Cabanela, no concello lucense de Navia de Suarna, quedou controlado ás 21.00 horas deste venres despois de ser estabilizado ás 03.33 horas do xoves. Segundo as estimacións provisionais da Consellería do Medio Rural, as lapas afectaron unha superficie de 20 hectáreas.
O lume iniciouse o mércores ás 19.23 horas e mobilizou un dispositivo de extinción integrado por un técnico, nove axentes, 14 brigadas, 14 motobombas, unha pa e un helicóptero. Estes son os medios acumulados que participaron ata o momento nos traballos.
A estabilización indica que o incendio evoluciona favorablemente, aínda que non equivale á súa extinción definitiva.
A Consellería do Medio Rural lembra que a cidadanía pode avisar da detección dun incendio forestal a través do teléfono gratuíto 085. Tamén está dispoñible a aplicación ALume, que permite informar sobre incendios forestais activos en Galicia.
Ademais, a Xunta mantén habilitado o número anónimo e gratuíto 900 815 085 para denunciar sospeitas ou coñecementos de actividades delituosas relacionadas coa provocación de incendios. A información actualizada sobre os lumes forestais que alcanzan as 20 hectáreas pode consultarse na conta de X @incendios085.