Decenas de persoas mobilizáronse este venres para esixir o arranxo da N-540
Este venres 4 de abril, decenas de persoas mobilizáronse en Chantada no punto quilométrico 51 da N-540 para reclamar medidas urxentes ante o mal estado da vía.
Denuncian que as fochancas, a falta de sinalización e a pouca iluminación desta estrada que conecta Lugo e Ourense afecta a todos os veciños e usuarios desta estrada, facendo que sexa “moi perigoso circular por varios tramos”.
Dende a Asociación de Empresarios de Chantada e CCA Ribeira Sacra manifestaron o seu apoio á veciñanza sumándose ás mobilizacións xa que, denuncian, “o estado da Nacional 540 afecta de xeito directo a todo o tecido empresarial e comercial da vila”.
Lembran que en decembro de 2023 xa se fixera unha mobilización para exixir o arranxo da estrada nacional, ademais de remitir unha carta ao ministro de Transportes, Óscar Puente, para pedir unha solución definitiva.
“O pésimo estado de conservación da Nacional 540 fai que sexa moi perigoso circular por varios tramos, e, malia a mobilización de 2023, neste tempo só se acometeron parches, sen dar unha solución real ao problema”, explican.
O vindeiro venres, 11 de abril, está convocada unha nova mobilización no mesmo punto, á altura da subestación de Vilela de Merlán.