Denuncian atrasos e falta de persoal no servizo de Radioterapia do HULA e reclaman solucións á Xunta
A Federación de Asociacións de Veciños volveu denunciar o funcionamento do servizo de Radioterapia do Hospital Universitario Lucus Augusti (HULA), dirixindo as súas queixas ao conselleiro de Sanidade, Antonio Gómez Caamaño, e reclamando melloras urxentes na atención aos pacientes.
Segundo explican, a protesta realizada días atrás tivo certo efecto, xa que nas dúas últimas semanas só se rexistrou unha xornada na que o acelerador deixou de funcionar, fronte ás interrupcións frecuentes que, aseguran, se producían anteriormente nos tratamentos. Aínda así, subliñan que persisten problemas importantes sen resolver.
Entre eles destacan os atrasos e esperas que consideran inxustificadas, especialmente graves no caso de pacientes que, debido ao tipo de tumor, deben permanecer en xaxún durante tres horas antes do tratamento. Denuncian que a estas condicións se suman esperas adicionais de entre unha e dúas horas, o que cualifican de situación “especialmente penosa” para persoas en estado de vulnerabilidade, e propoñen unha mellor planificación das citas para evitar este tipo de circunstancias.
Outro dos aspectos que sinalan é a falta de persoal especializado. Segundo indican, en Lugo hai actualmente catro especialistas en Oncoloxía Radioterápica, mentres que en Ourense, cunha carga asistencial similar, contan con oito profesionais, unha diferenza que consideran inxustificada e que, ao seu xuízo, sitúa á provincia nunha posición de desvantaxe.
En relación co novo acelerador previsto para o servizo, o colectivo reclama información clara sobre a súa posta en funcionamento. Neste sentido, lembran que un equipo instalado en Pontevedra en abril de 2025 aínda non está operativo, o que incrementa a preocupación sobre os prazos e a planificación deste tipo de infraestruturas.
Finalmente, confían en que as súas denuncias contribúan a mellorar o servizo de Radioterapia do HULA e insisten na necesidade de reforzar o cadro de persoal, incluíndo especialistas, técnicos e persoal de enfermaría, para garantir unha atención axeitada. Así mesmo, solicitan respostas concretas e con prazos definidos por parte da Administración autonómica, en beneficio dos pacientes e do conxunto da cidadanía da provincia.