Destacan o labor do punto de atención ao peregrino de Cruz Vermella en Portomarín
O conselleiro de Sanidade, Antonio Gómez Caamaño, puxo en valor o traballo que realiza o punto de atención ao peregrino de Cruz Vermella en Portomarín, un servizo que durante os meses de verán de 2025 prestou asistencia a preto de 1.000 camiñantes no seu posto fixo.
O responsable da carteira sanitaria visitou as instalacións acompañado polo director de Turismo de Galicia, Xosé Merelles; o xerente da área sanitaria de Lugo, A Mariña e Monforte de Lemos, Ramón Ares; representantes de Cruz Vermella e membros do goberno municipal.
O punto de atención permanece operativo durante os meses de xullo, agosto e setembro, de luns a domingo, entre as 14.00 e as 20.00 horas. Nel, persoal sanitario encárgase da valoración e tratamento de feridas superficiais, rozaduras e bochas, ademais de prestar os primeiros coidados fronte á fatiga e ao sobreesforzo. Nos casos que o requiren, os pacientes son derivados aos centros sanitarios do Servizo Galego de Saúde.
Durante a visita, Gómez Caamaño subliñou que este recurso constitúe un importante apoio para o sistema sanitario público galego, xa que contribúe a evitar desprazamentos innecesarios ao Punto de Atención Continuada (PAC) de Guntín e favorece un uso máis eficiente dos recursos asistenciais durante os meses con maior afluencia de peregrinos.
Ao mesmo tempo, destacou que este servizo facilita que os camiñantes reciban atención para as afeccións máis frecuentes sen necesidade de abandonar a ruta, unha vantaxe especialmente relevante tendo en conta que a maioría dos peregrinos non dispoñen de vehículo propio durante o Camiño.
O punto de atención de Portomarín forma parte do programa 'Contigo no Camiño' de Cruz Vermella, unha iniciativa na que persoal voluntario percorre o Camiño Francés en bicicletas e mediante unidades móbiles xeolocalizadas para prestar asistencia aos peregrinos.
Ao longo de 2025, este programa atendeu un total de 1.500 peregrinos entre Sarria e Santiago. Deles, 996 foron asistidos no punto fixo de Portomarín, mentres que outros 480 recibiron atención a través dos equipos móbiles.
O conselleiro agradeceu o labor desenvolvido polos profesionais e persoas voluntarias implicadas neste dispositivo e asegurou que a Xunta continuará impulsando esta colaboración con Cruz Vermella para reforzar a atención sanitaria aos peregrinos durante a campaña estival.
O PSdeG-PSOE de Portomarín critica a visita do conselleiro de Sanidade
O PSdeG-PSOE de Portomarín amosou a súa preocupación tras a visita ao municipio do conselleiro de Sanidade, Antonio Gómez Caamaño, ao considerar que se trataba dunha oportunidade para abordar e resolver algunhas das principais necesidades do concello, especialmente no ámbito sanitario.
Os socialistas lembran que o titular de Sanidade é o responsable dunha consellería que, ao seu xuízo, "podería solucionar moitas das cuestións importantes que afectan a Portomarín". Neste sentido, cuestionan se durante a reunión co alcalde se volveu reclamar a cobertura da praza de médico que permanece vacante no centro de saúde. Segundo sinalan, o rexedor xa asegurara o pasado ano que trasladara esta petición á Xunta, polo que consideran que "ou non lle fan caso ou está mentindo unha vez máis".
Desde o PSdeG-PSOE tamén consideran que a visita debería ter servido para coñecer de primeira man a situación das instalacións sanitarias do municipio. Así, lembran que hai só uns días se denunciaron temperaturas superiores aos 30 graos no interior do centro médico, unha situación que, segundo indican, afecta tanto aos profesionais como aos usuarios.
Outro dos asuntos que, ao seu entender, debería terse tratado durante a visita é a situación da auga en Portomarín. Os socialistas lembran que a Consellería de Sanidade é a administración competente para controlar a salubridade da auga de consumo e aseguran que o departamento autonómico coñece a problemática existente no municipio.
Ademais, destacan que na visita tamén participou o responsable de Turismo da Xunta de Galicia. Neste contexto, consideran que sería oportuno que atendese as queixas expresadas por peregrinos sobre o estado da auga e que este asunto fose abordado cos responsables municipais.