Axenda

O evento, que se celebrará no Salón Rexio do Círculo das Artes, reunirá 12 chefs de prestixio procedentes de Lugo, Galicia e Madrid, que ofrecerán unha experiencia culinaria única

O vindeiro 21 de febreiro, o Círculo das Artes de Lugo acollerá Diez Raziones, un evento culinario e benéfico que busca recadar fondos para as asociacións Raiolas e Down Lugo.

Esta cita solidaria conta co respaldo da Deputación Provincial, que achegou unha subvención de 6.000 euros para a súa organización. Ademais, a Xunta de Galicia tamén apoia a iniciativa, impulsada por restaurantes lucenses e diversas empresas de eventos e comunicación da cidade, coa colaboración da Escola de Hostalería do IES Sanxillao.

O evento, que se celebrará no Salón Rexio do Círculo das Artes, reunirá 12 chefs de prestixio procedentes de Lugo, Galicia e Madrid, que ofrecerán unha experiencia culinaria única.

A proposta inclúe un menú de 10 pratos e 10 sorteos, cun prezo de entrada de 100 euros, cantidade que se destinará integramente ás asociacións beneficiarias.

O deputado de Formación, Ensino e Economía do Coñecemento, Miguel Fernández Méndez, destacou a importancia deste tipo de iniciativas solidarias, sinalando que "ademais de fomentar a colaboración en favor dunha boa causa, contribúe á dinamización económica e á visibilidade de causas sociais". Así mesmo, subliñou o papel da gastronomía como motor de desenvolvemento turístico e económico para a provincia, demostrando que tamén pode ser utilizada como un vehículo para mellorar a sociedade.

CHEFS E PROGRAMA

Entre os chefs que participarán en Diez Raziones destacan Miguel F. Vidal do Restaurante Morgana (Madrid), xunto a recoñecidos cociñeiros galegos como Pablo Vila (Grupo Oca Hotels, Santiago de Compostela), Xoán Crujeiras (Restaurante Bido, A Coruña), Javier Rodríguez "Taky" (Cátering Boketé e Restaurante Taberna del Alabardero), Gerson Iglesias (Hotel Oca Vila de Allariz, Ourense) e Chisco Jiménez (Restaurante Culuca, A Coruña).

A gala dará comezo ás 21:00 horas cunha degustación de petiscos para abrir o apetito dos asistentes. A partir das 22:00 horas, os stands dos chefs participantes ofrecerán as súas creacións gastronómicas, convertendo a noite nunha auténtica celebración de sabores.

O evento tamén incluirá momentos de entretemento e espectáculo. Ás 23.00 horas, levarase a cabo un sorteo especial, seguido dunha actuación do Mago Rafa, que sorprenderá aos asistentes co seu talento. Para pechar a velada con música en vivo, ás 23.45 horas, a banda La Penúltima Sabinera ofrecerá unha actuación especial.

Coa organización deste evento, os promotores buscan fortalecer os recursos de Raiolas, que ofrece servizos a persoas con Trastorno do Espectro Autista (TEA), e potenciar un programa de fomento do emprego da asociación Down Lugo.

Diez Raziones non só celebrará a excelencia gastronómica, senón que tamén se consolidará como un referente de solidariedade e compromiso social en Lugo.