Elena Candia impulsa novas mesas de diálogo co persoal municipal e cos praceiros de Lugo
A alcaldesa de Lugo, Elena Candia, continúa avanzando en distintas liñas de diálogo abertas tanto co persoal municipal como cos praceiros da cidade. Ao longo desta semana, a rexedora mantivo diferentes encontros de traballo nos que se abordaron cuestións relacionadas coa organización interna do Concello e co funcionamento da Praza de Abastos.
No ámbito laboral, Candia presidiu a segunda mesa de traballo coa Xunta de Persoal, unha reunión centrada en avanzar na carreira profesional dos empregados públicos municipais, así como en estudar modificacións da Relación de Postos de Traballo que presentan situacións consideradas prioritarias. Durante o encontro tamén se tratou a planificación das futuras ofertas públicas de emprego de carácter sectorial.
Tras a xuntanza, a alcaldesa realizou unha valoración positiva do desenvolvemento das negociacións e anunciou a convocatoria da mesa de negociación colectiva para a vindeira semana, co obxectivo de continuar afondando nos asuntos pendentes e dar continuidade ao proceso de diálogo co persoal municipal.
Paralelamente, a rexedora mantivo outro encontro con representantes dos praceiros da cidade, acompañada pola concelleira de Industria e Mercados, Silvia Colmenero, e pola edil non adscrita María Reigosa. A reunión celebrouse a petición do propio colectivo para trasladar ao goberno local distintas necesidades relacionadas co día a día da Praza.
Durante esta reunión abordáronse varias demandas dos vendedores, entre elas a actualización dalgúns aspectos da ordenanza municipal que regula estas instalacións. Entre as cuestións expostas figuran a eliminación da obrigatoriedade de apertura en horario de tarde, a creación dun sistema de queixas e suxestións ou a incorporación de procedementos e accesos a través de ferramentas dixitais.
Co obxectivo de continuar avanzando nestas propostas, o Concello convocará proximamente a Comisión de Prazas e Mercados. Ademais, tanto a alcaldesa como o seu equipo comprometéronse a mellorar a comunicación cos praceiros, reforzando as canles de diálogo e apostando por unha relación baseada na transparencia, a colaboración e o entendemento entre ambas partes.