Política

O executivo local activa un decreto de organización para impulsar o Plan de Acción para Lugo, centrado na mellora dos servizos públicos e a atención á veciñanza

O novo goberno municipal de Lugo, liderado pola alcaldesa Elena Candia López, xa se atopa en funcionamento tras o envío aos servizos xurídicos do decreto de organización no que se concreta a distribución das distintas áreas de xestión.

Segundo sinala o executivo, o obxectivo é comezar a traballar desde o primeiro momento para poñer en marcha as case cincuenta propostas recollidas no Plan de Acción para Lugo, que se centra na mellora dos servizos públicos, a optimización da xestión municipal e o reforzo da atención á cidadanía.

A estrutura do goberno queda configurada coa propia alcaldesa á fronte de Medio Ambiente, Xestión Integral de Recursos Humanos e Seguridade. Cristina Sanz Arias asumirá Dinamización Económica e Relacións Institucionais; Antonio Ameijide Osorio, Mobilidade e Obras; Javier Vázquez Prado, Cultura e Educación; Flor Rubinos Rois, Zona Rural; Ramón Manuel Cabarcos Rodríguez, Urbanismo; Gustavo Enrique Díaz Rey, Política Social, Maiores e Migración; Agustín Gallego Vigo, Turismo e Museos; Mar Carballas Piñeiro, Economía, Participación, Servizos á Veciñanza e Benestar Animal; Damián Carballo Méndez, Deportes, Infancia e Xuventude; Aurora Aida Goás Castro, Muller e Conciliación; e Silvia Colmenero Guzmán, Industria e Mercados.

Pola súa banda, a concelleira non adscrita María Reigosa Castro, en aplicación do artigo 73.3 da Lei 7/1985, do 2 de abril, reguladora das bases do réxime local, desenvolverá funcións de supervisión política e programática das actuacións municipais en materia de infraestruturas de maneira transversal.