Elena López, de Samos, compartiu a súa experiencia no enduro nunha charla organizada por Auxilia Lugo
Elena López, piloto de enduro natural de Samos, participou nunha charla organizada pola delegación de Lugo de Auxilia, onde compartiu coa asistencia a súa experiencia persoal e deportiva nunha disciplina na que a presenza das mulleres continúa sendo fundamental para avanzar cara a unha maior igualdade e visibilidade.
Durante a xornada, a deportista relatou vivencias e reflexións sobre a súa traxectoria no mundo do motor, un ámbito no que as mulleres seguen abrindo camiño e contribuíndo a derrubar barreiras e estereotipos que historicamente estiveron ligados a este tipo de deportes.
Desde a organización puxeron en valor a importancia de iniciativas deste tipo, destacando que coñecer historias persoais como a de Elena López permite reflexionar sobre a necesidade de seguir apoiando ás mulleres que continúan gañando espazo en sectores nos que aínda existen desafíos pendentes.
Auxilia Lugo agradeceu tamén a proximidade da piloto e a súa disposición para compartir a súa experiencia durante a actividade. A entidade quixo recoñecer igualmente a participación e o interese das persoas asistentes, sinalando que a súa implicación resulta fundamental para o desenvolvemento deste tipo de iniciativas.