Deportes

Ruiz participou en 32 partidos en todas as competicións, anotando tres goles e dando unha asistencia, datos que reflicten a súa relevancia no equipo

O Club Deportivo Lugo comunicou que Erik Ruiz, un dos capitáns do primeiro equipo, non continuará na disciplina albivermella a vindeira tempada.

Dende a súa chegada ao Anxo Carro o pasado verán, o defensa central converteuse nunha peza fundamental tanto dentro como fóra do campo, destacando polo seu liderado, compromiso e implicación co proxecto do club.

Ruiz participou en 32 partidos en todas as competicións, anotando tres goles e dando unha asistencia, datos que reflicten a súa relevancia nun equipo marcado pola inestabilidade. A súa profesionalidade valeulle o respecto da afección, do vestiario e de toda a familia albivermella, que hoxe lle desexa o mellor no seu futuro profesional e persoal.

Porén, a saída de Erik Ruiz podería non ser a única. A recente dimisión do director deportivo Roberto Sáez, que anunciara que deixaría o cargo se se despedía a Toni Seligrat, deixou ao club sen dirección deportiva. Seligrat foi destituído tras a contundente derrota por 0-4 ante o Barça Atlètic no Anxo Carro, que afundiu ao equipo en postos de descenso e nunha xeira de cinco derrotas consecutivas. Desde entón, Álex Ortiz, adestrador do filial, asumiu o mando do primeiro equipo.

Nun contexto de incerteza, o club non deu sinais de estar buscando un novo director deportivo que poida negociar co plantel nin realizar fichaxes, mentres outros equipos xa comezan a facer ofertas a xogadores como Erik Ruiz. A súa marcha deixa un baleiro importante na defensa e engade máis dúbidas ao futuro inmediato dun CD Lugo que loita por saír adiante na Primeira RFEF.