Esquerda Unida condena a moción de censura do PP e denuncia o transfuguismo político
Esquerda Unida vén de expresar o seu rexeitamento á moción de censura presentada polo Partido Popular no Concello de Lugo co apoio dunha concelleira tránsfuga, unha situación que consideran unha grave vulneración dos principios democráticos.
Desde a organización sinalan que o transfuguismo político supón unha deslealdade tanto cara ás formacións que confiaron en determinadas persoas como cara á cidadanía que depositou o seu voto nas urnas. Ao seu xuízo, trátase ademais dunha forma de corrupción que altera as maiorías expresadas democraticamente e que teñen reflexo nas institucións.
Neste contexto, lembran a existencia do Pacto Antitransfuguismo, aprobado en xullo de 1998 e actualizado por última vez en novembro de 2020, no que as forzas políticas se comprometen a non aceptar nin apoiar a persoas tránsfugas nos seus grupos nin a utilizar esta figura para modificar maiorías de goberno. Segundo Esquerda Unida, o Partido Popular, pese a ter asinado este acordo —do que se desvinculou en 2021—, non está a cumprir cos seus principios, o que, aseguran, cuestiona a súa credibilidade política.
O pacto define como tránsfugas aos representantes locais que, traizoando a súa formación ou apartándose das decisións adoptadas polos órganos competentes, pactan con outras forzas para alterar ou manter maiorías de goberno nunha entidade local.
No caso concreto de Lugo, Esquerda Unida considera que a edil María Reigosa debería renunciar á súa acta se as decisións do seu partido entran en contradición coa súa posición persoal. Ademais, advirten de que, no suposto de integrarse no goberno local, debe aplicarse con rigor a lexislación vixente, en particular o establecido na Lei de Bases de Réxime Local, que limita os dereitos políticos e económicos das persoas non adscritas.
A formación tamén lembra unha sentenza do Tribunal Supremo do 27 de outubro de 2020, na que se establece que os concelleiros tránsfugas non poden acceder a novos cargos nin percibir retribucións que supoñan vantaxes políticas ou económicas respecto da súa situación anterior.
Finalmente, ante a iniciativa impulsada por Elena Candia e o Partido Popular, Esquerda Unida fai un chamamento ao rexeitamento social destas prácticas, advertindo de que priorizan intereses persoais sobre o ben común e contribúen a deteriorar a confianza da cidadanía nas institucións e nos procesos democráticos.