Eugenio Corral toma as rendas de Aspnais tras unhas eleccións históricas para a entidade lucense
Eugenio Corral é o novo presidente de Aspnais despois de impoñerse nas primeiras eleccións celebradas pola entidade nos seus sesenta anos de historia. O xerente da Asociación Provincial de Empresarios da Construción de Lugo (Apec) conseguiu 94 votos, mentres que a candidatura encabezada por Bernardino Pardo reuniu 44 apoios.
A votación tivo lugar este sábado e contou coa participación das familias chamadas a decidir o futuro da asociación de Pais ou Titores de Persoas con Discapacidade Intelectual de Lugo. En total, 173 familias tiñan dereito a participar nun proceso electoral inédito para unha entidade que leva seis décadas traballando no ámbito da discapacidade intelectual e apoiando as persoas usuarias e as súas familias.
Corral estará acompañado á fronte de Aspnais por un equipo no que continúa o ata agora presidente, José Reigosa, que pasa a formar parte da súa candidatura. A nova directiva contará con Serafín Antonio Fernández como vicepresidente, Pilar Saavedra como secretaria, Jesús Sánchez como vicesecretario e José Antonio Pérez como tesoureiro.
Completan a candidatura como vogais Lucía Saavedra, Nahum Reija, Roberto Aller e Ángel Rivera.
Co resultado das votacións péchase así o proceso electoral aberto para definir a nova dirección de Aspnais, que inicia unha nova etapa tras seis décadas de actividade social en Lugo.