Éxito da XVII Limpeza Simultánea de Ríos no Miño
O domingo 29 de setembro, celebrouse con éxito a XVII Limpeza Simultánea de Ríos na zona do Miño, ao carón da sede da UNED de Lugo, unha acción de voluntariado ambiental que contou coa participación activa de 15 persoas. A actividade, organizada por ADEGA Lugo, Coidemos Lugo e a UNED de Lugo, enmárcase dentro do Proxecto Ríos, e logrou retirar un total de 220 kg de residuos, maioritariamente toalliñas, produtos de hixiene íntima e algún que outro residuo plástico e metálico.
Por terceiro ano consecutivo, a UNED de Lugo sumouse a esta iniciativa como parte do seu compromiso co coidado do medio ambiente. En colaboración con Coidemos Lugo, a universidade non só prestou apoio loxístico e educativo, senón que tamén fomentou a participación activa da súa comunidade universitaria. Nesta ocasión, a acción de limpeza centrouse no Parque da Tolda, unha área crítica dentro da Reserva da Biosfera Terras do Miño, especialmente afectada polos desbordamentos dun desaugadoiro que danaron gravemente a contorna fluvial.
A xornada, que se estendeu durante aproximadamente tres horas, reflicte a importancia do voluntariado ambiental como unha ferramenta esencial para a conservación dos nosos ríos. A través da colaboración de 70 entidades en toda Galicia, na edición do ano anterior logrouse retirar máis de 6 toneladas de lixo, destacando o impacto positivo destas xornadas na saúde dos ecosistemas fluviais. A UNED de Lugo, ao coordinar a limpeza nunha das zonas máis afectadas da cidade, reforza así a súa misión de concienciación e educación ambiental, tanto entre o alumnado como na sociedade local.
A través de iniciativas como esta, non só se consigue unha mellora inmediata nas condicións do río Miño, senón que se fomenta unha reflexión crítica sobre o impacto humano nos ecosistemas acuáticos e a necesidade urxente de adoptar hábitos máis sustentables. A limpeza de ríos organizada en Lugo demostra, unha vez máis, que o traballo colectivo pode ter un impacto profundo na conservación do medio ambiente e no futuro das novas xeracións.