Falcatrueiros organiza dous grandes eventos culturais en Monterroso os días 10 e 11 de agosto
A Asociación Sociocultural Falcatrueiros volverá converter Monterroso nun referente da programación cultural durante o mes de agosto coa organización de dúas destacadas citas que combinarán música e danza tradicional.
A primeira delas celebrarase o 10 de agosto, ás 21.30 horas, na Praza Antonio Rojo Losada, dentro do programa Móvete 2026 da Vicepresidencia da Deputación de Lugo. O concerto reunirá sobre o mesmo escenario a Caamaño & Ameixeiras e De Vacas, dúas das formacións máis recoñecidas da música galega actual.
A programación continuará o 11 de agosto coa celebración do XL Festival Internacional de Danza, que dará comezo ás 21.30 horas na Praza Conselleiro Fernando Salgado, no Auditorio A Cúpula. O espectáculo contará coa participación do grupo folclórico Karsa Seni, procedente de Indonesia, e da Asociación Sociocultural Falcatrueiros, que actuará xunto ao artista Davide Salvado. A entrada terá un prezo de 3 euros, que incluirá a participación nunha rifa.
Como actividade previa ao festival, o 10 de agosto ás 18.30 horas desenvolverase o obradoiro Danzas do Mundo, tamén na Praza Antonio Rojo Losada, unha proposta aberta á participación do público para achegar diferentes tradicións coreográficas internacionais.
Con estas iniciativas, Falcatrueiros reforza a súa aposta pola difusión da cultura tradicional, a música e o intercambio internacional, consolidando a programación estival de Monterroso como unha das máis destacadas da comarca.