Fontiñas experimentará cortes de tráfico durante dez días pola reparación dun colector
O Concello de Lugo iniciará o vindeiro luns, 23 de marzo, os traballos de reparación do colector de saneamento situado na intersección da Ronda das Fontiñas co Carril dos Indios, unha actuación destinada a solucionar unha incidencia detectada neste punto da rede e garantir o seu correcto funcionamento.
A intervención será executada pola empresa concesionaria do servizo e contará cun prazo aproximado de dez días. Co fin de reducir o impacto na mobilidade, os traballos organizaranse en dúas fases diferenciadas, adaptándose ás condicións da vía e ás necesidades do tráfico.
As actuacións permitirán intervir no tramo afectado do colector e tamén corrixir os danos detectados na calzada como consecuencia da avaría, mellorando así a seguridade e as condicións de circulación nesta zona da cidade.
Para levar a cabo as obras, será necesario aplicar restricións ao tráfico rodado na Ronda das Fontiñas, especialmente no sentido cara á rúa San Eufrasio na súa intersección co Carril dos Indios. Durante todo o período de execución limitarase o paso de vehículos neste sentido e prohibirase o estacionamento entre os números 62 e 96, aínda que se procurará manter o acceso a vivendas e garaxes.
Na primeira fase, reorganizarase a circulación mediante a habilitación dun dobre sentido provisional no tramo afectado, empregando os carrís de estacionamento do lado contrario para garantir a mobilidade.
Na segunda fase, debido á maior ocupación da calzada, será preciso desviar o tráfico cara á rúa San Eufrasio por itinerarios alternativos que discorrerán polo Carril do Xuízo, a rúa Ramón Montenegro, a rúa Primavera e o Carril das Flores. Neste punto, só se permitirá o paso de autobuses urbanos polo tramo afectado, que estará controlado en todo momento por operarios sinalistas.
Para garantir a seguridade, instalarase sinalización específica en todos os accesos á zona, incluíndo avisos de obras, limitación da velocidade a 20 km/h e restricións de acceso. Ademais, o operativo contempla o valado completo da área de intervención e a canalización do tráfico tanto rodado como peonil.
No caso de que os traballos continúen en horario nocturno, habilitaranse dispositivos luminosos para mellorar a visibilidade. O Concello asegura tamén que se manterá en todo momento o tránsito peonil e o acceso a vivendas, locais e garaxes, informando previamente das posibles limitacións puntuais.
Desde o Goberno local recoméndase ás persoas condutoras evitar circular pola zona durante o desenvolvemento das obras e empregar rutas alternativas, atendendo sempre á sinalización provisional e ás indicacións da Policía Local.