Friol acolle a proxección do documental 'De sol a sol' coa participación das súas protagonistas
O Centro Sociocultural de Friol será escenario este venres 6 de marzo, ás 12:30 horas, da proxección do documental De sol a sol, unha peza audiovisual que recupera o histórico programa da TVE Vivir cada día, emitido en 1978 e centrado nas duras condicións de vida das mulleres no rural galego a finais dos anos setenta.
A iniciativa permitirá revisitar este testemuño audiovisual que recolle a realidade cotiá das mulleres da parroquia de Lamas, poñendo en valor a súa dignidade, esforzo e capacidade de superación nun contexto marcado pola dureza do traballo e a escaseza de recursos.
O acto contará coa intervención das protagonistas do documental, Consuelo Rodríguez Serén e Clara Rodríguez Expósito, que compartirán co público as súas lembranzas e reflexións arredor daquela experiencia televisiva que deixou constancia dunha etapa fundamental da historia social recente.
A proxección preséntase como unha oportunidade para achegar ás novas xeracións unha parte da memoria colectiva do rural galego, ao tempo que rende homenaxe ás mulleres que, co seu traballo diario “de sol a sol”, sostiveron durante décadas a vida nas aldeas.
A actividade enmárcase nun contexto de reivindicación e recoñecemento do papel das mulleres na sociedade, ofrecendo un espazo para a reflexión e o diálogo interxeracional arredor da memoria, a identidade e o valor do testemuño histórico.