Friol acollerá o luns unha xornada de networking para impulsar a colaboración entre emprendedores
O Polo de Emprendemento e Apoio ao Emprego de Friol organizará o próximo luns 28 de setembro unha xornada de networking dirixida ás persoas beneficiarias da Rede de Polos, co obxectivo de favorecer o coñecemento mutuo entre emprendedores e abrir novas oportunidades de colaboración profesional.
A sesión desenvolverase entre as 10.30 e as 13.30 horas na sede do Polo, situada na rúa Deputación, número 18, e está concibida como un espazo dinámico no que os participantes poderán presentar as súas iniciativas, identificar necesidades comúns e establecer contactos que poidan derivar en futuros proxectos compartidos.
Baixo o lema “Quen son? Que necesito? Que busco?”, a organización propón unha metodoloxía participativa centrada na creación dun mapa de sinerxías entre os distintos emprendedores da rede. Ademais das presentacións, a xornada incluirá un café networking pensado para facilitar un ambiente distendido que favoreza o intercambio de ideas e experiencias.
Desde o Polo de Friol destacan que este tipo de encontros pretenden fortalecer a comunidade emprendedora do territorio, poñendo en contacto persoas con perfís e sectores diferentes que poden atopar puntos de colaboración e novas vías de desenvolvemento empresarial.
A actividade enmárcase nas accións da Rede de Polos de Emprendemento e Apoio ao Emprego, unha iniciativa impulsada pola Xunta de Galicia e financiada con fondos europeos NextGenerationEU, orientada a fomentar o emprendemento, a innovación e a creación de oportunidades económicas no ámbito local.