Rural

O seu obxectivo é poñer en valor a calidade xenética, o traballo das explotacións e o papel estratéxico do sector lácteo na economía rural

O Concello de Friol, en colaboración con Africor e coa participación da Xunta de Galicia, organiza a IV Poxa de Gando Frisón de Friol, que terá lugar o sábado 31 de xaneiro, ás 12:00 horas, no Mercado Gandeiro de Friol.

Este evento consolídase como unha cita de referencia dentro do sector gandeiro galego, reunindo a profesionais, gandeiros e afeccionados ao gando frisón, cun obxectivo claro: poñer en valor a calidade xenética, o traballo das explotacións e o papel estratéxico do sector lácteo na economía rural.

A poxa contará cunha coidada selección de 20 exemplares de gando frisón, procedentes de explotacións destacadas, ofrecendo unha excelente oportunidade tanto para a compra como para o intercambio de coñecemento e experiencias entre os asistentes.

Desde a organización destacan a importancia de iniciativas coma esta para dinamizar o rural, apoiar ao sector primario e reforzar Friol como punto de encontro do gando galego.

A entrada é libre e está aberta a todo o público interesado.