Friol presenta as III Olimpíadas Rurais de Galicia que contarán con deporte tradicional, música e gastronomía
Friol volverá situarse este verán no centro do deporte tradicional e da cultura popular galega coa celebración das III Olimpíadas Rurais de Galicia, que terán lugar os próximos 26, 27 e 28 de xuño e que se consolidan xa como unha das citas lúdico-deportivas máis destacadas do rural galego.
A terceira edición do evento foi presentada este sábado nun acto celebrado no municipio lucense coa participación do alcalde de Friol, José Ángel Santos; do delegado territorial da Xunta en Lugo, Javier Arias; e de responsables da organización. Tras o éxito acadado nas dúas primeiras edicións, Friol repetirá como sede dun evento impulsado pola Xunta de Galicia a través da Consellería do Medio Rural, en colaboración coa Axencia Turismo de Galicia e o Concello de Friol, contando novamente coa coordinación do colectivo deportivo Hércules.
As Olimpíadas Rurais naceron co obxectivo de recuperar e poñer en valor os xogos populares, as tradicións e a convivencia propias do rural galego, combinando deporte, música, gastronomía e turismo nun ambiente festivo pensado para todas as idades. Ao longo de tres días, o municipio recibirá centos de participantes e visitantes chegados de distintos puntos de Galicia e tamén doutras comunidades, convertendo Friol nun importante escaparate de dinamización económica, social e turística.
A programación arrancará o venres 26 de xuño coa gala inaugural e o tradicional desfile dos equipos participantes polas rúas da vila ata a Praza Andón Cebreiro, que volverá ser o epicentro principal das actividades. Neste espazo realizarase a presentación oficial dos equipos e disputaranse as primeiras probas da competición.
Nesta edición participarán 20 equipos integrados por 20 persoas maiores de 16 anos, que competirán durante toda a fin de semana en diferentes xogos tradicionais nos que se poñerán a proba a forza, o equilibrio, a habilidade e a destreza dos participantes.
Entre as probas máis destacadas manteranse algunhas das máis populares e espectaculares de anos anteriores, como a cucaña, a cesta va, os zancos, as cintas, a carreira de sacos, a piola, a carreira de lazos, a billarda, a chave de Ferrol, a carreira de carretilla, a comba, o tiro da corda, o lanzamento de adoquín ou a cadeira da raíña. Ademais, a organización avanzou que haberá novas actividades e sorpresas que se irán coñecendo nas próximas semanas.
AS NOVIDADES
Unha das novidades anunciadas polo alcalde, José Ángel Santos, será a invitación ao xantar do domingo para os 400 participantes desta terceira edición, reforzando así o espírito de convivencia que caracteriza o evento.
Precisamente, a gastronomía volverá ter un papel protagonista durante toda a fin de semana. Nas mañás do sábado e do domingo celebraranse almorzos con produtos típicos da comarca, mentres que os xantares populares reunirán participantes e visitantes nun ambiente festivo e de irmandade. O evento servirá tamén para promocionar algúns dos produtos máis representativos de Friol e da súa contorna.
A música e a animación serán outro dos grandes atractivos das Olimpíadas Rurais. A organización prepara unha intensa programación musical con concertos, charangas, DJs e actividades para todos os públicos ao longo das tres xornadas. O venres pola noite actuarán LouBand e DJ Cosme; o sábado ao mediodía será a quenda da Charanga ChisPum e xa pola noite subirán ao escenario A Banda da Balbina e Los Alcántara. O domingo, durante a sesión vermú, actuará a Charanga Bamboleo e, a partir das 18.00 horas, La Indirigible será a encargada de pechar oficialmente esta terceira edición das Olimpíadas Rurais de Galicia.
UNHA CITA IMPRESCINDIBLE
Durante a presentación, o alcalde de Friol destacou que “as Olimpíadas Rurais son xa unha cita imprescindible para o noso municipio e para toda Galicia, porque conseguen unir tradición, convivencia e promoción do rural nun ambiente único”. Ademais, subliñou a aposta do Concello por impulsar eventos capaces de dinamizar a economía local e situar a Friol como referente dos grandes acontecementos culturais e deportivos do rural galego.
Pola súa banda, Javier Arias sinalou que esta iniciativa representa “os valores do rural galego: participación, tradición, identidade e futuro”, destacando tamén o importante impacto turístico e económico que xeran este tipo de actividades nos concellos do interior de Galicia.
Co paso dos anos, as Olimpíadas Rurais de Galicia consolidáronse como unha proposta innovadora capaz de combinar tradición e modernidade, recuperando xogos populares galegos e achegándoos ás novas xeracións. O evento supón ademais un importante impulso económico, turístico e mediático para Friol e para toda a comarca, reforzando a imaxe do rural galego como un espazo vivo, dinámico e con futuro.
Con esta terceira edición, Friol aspira novamente a superar o éxito acadado en anos anteriores e continuar posicionándose como un dos grandes referentes dos eventos culturais e deportivos do rural galego.