Inaugúrase a exposición de Oniel Rodríguez na Delegación da Xunta en Lugo
A Delegación Territorial da Xunta en Lugo abriu ao público neste mes de novembro unha exposición pictórica do creador cubano Oniel Rodríguez, quen participou esta tarde no acto inaugural acompañado polo delegado territorial, Javier Arias, así como por outras autoridades e asistentes.
A proposta artística, titulada “Grazas Galicia”, reúne quince pezas, maioritariamente acuarelas sobre papel en formato mediano, ás que se suman dous cadros realizados con técnica acrílica. A colección rende homenaxe ás paisaxes galegas e inclúe imaxes emblemáticas da cidade de Lugo, recoñecibles para veciños e visitantes.
Rodríguez, que chegou a Galicia no ano 2023 e vive na capital lucense, conta cun amplo percorrido creativo e destaca por empregar técnicas diversas. Parte do seu traballo presenta a particularidade de estar elaborado con café, unha das marcas distintivas do seu estilo persoal.