Javier Arias toma posesión como novo director xeral de Urbanismo do Concello de Lugo
Javier Arias Fouz tomou posesión como novo director xeral de Urbanismo do Concello de Lugo nun acto formalizado pola alcaldesa, Elena Candia, acompañada pola secretaria xeral do Concello, Ana María Rivas García.
Durante a súa intervención, a rexedora informou de que xa deu instrucións ao Servizo de Persoal para avanzar na cobertura doutros postos considerados necesarios para reforzar o funcionamento do departamento. Entre eles figuran a xefatura de Recursos Humanos, a xefatura do Servizo de Urbanismo, unha praza de arquitecto e a previsión da substitución dun posto administrativo ante a próxima xubilación dun empregado desta área.
Candia explicou que Urbanismo constitúe un dos servizos estratéxicos da administración local e sinalou a necesidade de contar cunha estrutura dimensionada de acordo co volume de traballo que xestiona diariamente. Neste sentido, destacou que o obxectivo é axilizar a tramitación das licenzas e ofrecer unha resposta máis rápida e eficaz á cidadanía.
A alcaldesa tamén puxo en valor a incorporación de novos perfís técnicos, ao considerar que permitirán reforzar a capacidade de xestión do departamento e contribuír ao desbloqueo de expedientes. Segundo indicou, esta mellora organizativa favorecerá o desenvolvemento de proxectos e investimentos na cidade.