Jorge Bustos reivindica o éxito do Arde Lucus como froito da planificación anterior
O concelleiro socialista de Lugo, Jorge Bustos, realizou un balance do Arde Lucus 2026 no que reivindicou o éxito de participación e afluencia como resultado directo da planificación desenvolvida polo anterior Goberno municipal durante os últimos meses.
Bustos lembrou que as principais novidades desta edición, coincidente co 25 aniversario da festa, foron deseñadas e impulsadas durante a súa etapa á fronte da área de Xuventude, entre elas a reordenación de espazos, novas localizacións de actividades e campamentos, a ampliación da programación e eventos como o concerto de Abraham Cupeiro.
Segundo afirmou, o funcionamento da festa foi posible grazas a un traballo previo sólido e a decisións estratéxicas xa pechadas antes do cambio de goberno, incluíndo colaboracións institucionais e patrocinios privados que permitiron ampliar a oferta cultural. Neste sentido, sostivo que o actual executivo municipal se atopou cun proxecto practicamente estruturado.
O edil socialista tamén criticou que o Goberno local prescindise na fase final da organización da experiencia do persoal técnico que participara na preparación da festa, o que ao seu xuízo supuxo unha perda de coñecemento acumulado nun evento destas dimensións.
Especialmente crítico mostrouse coa suposta falta de visibilidade institucional do 25 aniversario do Arde Lucus, ao considerar que se minimizou unha efeméride de especial relevancia para a cidade.
Bustos tamén sinalou aspectos mellorables na edición, como o cumprimento dos compromisos económicos coas asociacións de recreación histórica, ás que definiu como “o corazón da festa”, e advertiu de que moitas delas aínda non recibiron os anticipos comprometidos.
En materia de seguridade, denunciou que o Plan de Autoprotección se elaborou tarde e sen a anticipación necesaria, o que xerou incertezas entre os colectivos participantes. Tamén apuntou a descoordinación nalgúns aspectos organizativos e deficiencias na decoración e na programación de determinadas actividades.
O concelleiro concluíu que o Arde Lucus é unha festa “máis forte ca calquera goberno”, froito do traballo colectivo de anos, e defendeu un modelo baseado na planificación, o rigor histórico e a colaboración co tecido asociativo. Finalmente, agradeceu o labor dos efectivos e colectivos implicados no dispositivo de seguridade, que cualificou de “impecable e exemplar”.
O CONCELLO DE LUGO SACA PEITO
A alcaldesa de Lugo, Elena Candia, fixo unha valoración da última edición do Arde Lucus, poñendo o foco na elevada participación rexistrada e na implicación dos diferentes colectivos que contribuíron ao desenvolvemento da celebración. A rexedora resaltou especialmente o papel desempeñado polas asociacións de recreación histórica, ás que cualificou como un elemento esencial da identidade desta cita festiva.
Durante a súa comparecencia, Candia explicou que a celebración se desenvolveu cun resultado moi positivo pese ás elevadas temperaturas que marcaron a fin de semana. Esta situación obrigou a introducir determinados cambios na programación e a adoptar medidas concretas destinadas a reducir os efectos da calor tanto entre os participantes como entre o público asistente.
A alcaldesa iniciou a súa intervención trasladando o seu agradecemento a todas as persoas implicadas na organización do evento. Entre elas destacou ao concelleiro de Xuventude, Damián Carballo, así como ao persoal municipal e especialmente aos traballadores vinculados a este servizo.
No ámbito da seguridade, Candia lembrou que un dos principais obxectivos establecidos nesta edición foi reforzar os dispositivos destinados a garantir o correcto desenvolvemento da festa. Segundo sinalou, os resultados acadados e a evolución dos distintos actos permitiron comprobar a eficacia dun dos operativos máis completos das últimas edicións grazas ao traballo desenvolvido polos servizos de emerxencias e polos corpos de seguridade.
Neste sentido, expresou o seu recoñecemento ao labor realizado por Bombeiros, Policía Local, Protección Civil, Policía Nacional e Policía Autonómica, así como ao resto de profesionais que participaron no dispositivo coordinado. Tamén agradeceu a colaboración da Axencia Galega de Emerxencias, que facilitou recursos para reforzar o posto de mando avanzado, e do CIFP As Mercedes, que contribuíu cunha unidade de drons utilizada para controlar os aforos e facer un seguimento en tempo real dos actos con maior asistencia.
A rexedora tamén fixo unha mención especial ás Asociacións de Pais e Nais e á comunidade educativa que participou no desfile escolar celebrado durante a xornada do domingo.
Candia ampliou ademais o seu agradecemento ás empresas e aos servizos que colaboraron no desenvolvemento da festa, especialmente aos encargados das tarefas de limpeza e mantemento dos espazos públicos, así como aos traballadores municipais que durante estes días contribuíron a ofrecer a mellor imaxe da cidade.
Durante a súa intervención, a alcaldesa quixo poñer en valor o traballo das asociacións de recreación histórica, lembrando as visitas realizadas aos distintos campamentos instalados durante a celebración. Segundo indicou, estes colectivos continúan sorprendendo cada ano pola súa capacidade para innovar, divulgar a historia local e ofrecer actividades de gran calidade.
Tamén destacou a aposta realizada nesta edición para reforzar a decoración e a ambientación en diferentes puntos da cidade, especialmente na Praza de Santo Domingo e na Rúa da Raíña, ademais da ampliación das actividades de dinamización distribuídas polos distintos espazos festivos.
No ámbito da promoción, Candia subliñou que o Arde Lucus conseguiu superar por primeira vez os 1,8 millóns de impactos nas redes sociais, unha cifra que considera unha mostra do crecente alcance e proxección que a celebración está acadando tanto dentro como fóra de Galicia.
Durante a comparecencia, a alcaldesa tamén realizou un exercicio de transparencia sobre os gastos da celebración, lembrando que o orzamento global da festa se situou arredor dos 600.000 euros.
Para concluír, Candia asegurou que esta edición volveu demostrar a capacidade de Lugo para continuar impulsando unha celebración convertida nun dos seus principais símbolos de identidade.