Infraestructuras

A intervención contou cun investimento duns 200.000 euros e foi executada baixo a supervisión dun equipo técnico especializado

O conselleiro de Cultura, José López Campos, anunciou este xoves que os traballos de reparación do paramento interior da Muralla de Lugo que se derrubou hai aproximadamente un mes na rúa do Moucho están a piques de finalizar. O responsable autonómico realizou estas declaracións tras visitar a zona para supervisar o estado das actuacións levadas a cabo.

A intervención contou cun investimento duns 200.000 euros e foi executada baixo a supervisión dun equipo técnico especializado. Na visita tamén estiveron presentes o delegado territorial da Xunta en Lugo, Javier Arias; o director xeral de Patrimonio Cultural, Ángel Miramontes; e o arqueólogo experto na Muralla, Ignacio López de Rego.

Desde a Xunta destacouse a rapidez coa que se desenvolveron os traballos e subliñouse a importancia do Plan de Conservación e Xestión da Muralla como ferramenta fundamental para afrontar este tipo de incidencias con eficacia. López Campos lembrou que este monumento, ademais de formar parte da vida cotiá da cidade, require un seguimento constante para garantir a súa conservación.

O conselleiro puxo en valor o labor do equipo de especialistas encargado da intervención, así como a colaboración da cidadanía e o traballo da empresa responsable da reparación.

Ademais, avanzou que a planificación prevista para os anos 2026 e 2027 contempla novas actuacións de mantemento e conservación por un importe aproximado dun millón de euros, co obxectivo de continuar desenvolvendo as liñas marcadas polo Plan Director da Muralla. Segundo explicou, non se tratará de grandes obras, senón de actuacións continuadas orientadas a preservar o bo estado deste monumento, declarado Patrimonio da Humanidade hai 25 anos.

Pola súa parte, o arqueólogo Ignacio López de Rego destacou a relevancia do Plan Director, estruturado en catro grandes ámbitos de traballo: conservación, xestión, difusión e participación. Segundo explicou, os estudos realizados permitiron coñecer con detalle as características do lugar no que se produciu o derrubamento, onde existía unha antiga escaleira romana. O especialista indicou que o colapso estivo relacionado cunha intervención incorrecta realizada durante obras executadas no século pasado.

López de Rego tamén se referiu ás actuacións que se están levando a cabo para mellorar a convivencia da Muralla coa flora e a fauna que se desenvolven no monumento. Neste sentido, estanse probando novos produtos para eliminar a vexetación que pode danar a estrutura sen causar impactos negativos no entorno. Os estudos máis recentes apuntan a realizar dúas actuacións de control ao ano, unha na primavera e outra no outono.

Ademais, estanse avaliando distintos tipos de pavimentos co obxectivo de mellorar a evacuación da auga e recuperar, na medida do posible, materiais e técnicas construtivas empregadas na época romana.

Por agora non se prevén modificacións estruturais na Muralla, aínda que se están realizando probas nalgúns cubos para obter información técnica que permita valorar posibles intervencións no futuro se fose necesario.