Lugo abre unha nova tempada das Escolas Deportivas municipais con instalacións gratuítas
O Concello de Lugo porá en marcha unha nova tempada das Escolas Deportivas municipais para o curso 2026-2027, cunha ampla oferta de actividades destinadas a fomentar a práctica deportiva entre os nenos, nenas e mozos da cidade. A iniciativa, impulsada pola Concellería de Deportes, contará coa colaboración dos clubs e entidades participantes, que poderán utilizar de forma gratuíta diferentes instalacións municipais para desenvolver as súas actividades.
As escolas desenvolveranse en espazos como os polideportivos de Frigsa e O Palomar, o Daniel Cordido, a Casa do Deporte, a Piscina Municipal das Pedreiras e o Pavillón Municipal dos Deportes, ademais doutras instalacións nas que se impartan determinadas disciplinas.
O concelleiro de Deportes, Damián Carballo, destacou o compromiso municipal co deporte base e puxo en valor a participación da cidadanía desde idades temperás. "O fomento da práctica do deporte base conta co apoio incondicional do Concello. É un orgullo comprobar a gran cantidade de lucenses que practican deporte xa desde pequenos e a enorme actividade que cada semana desenvolven os clubs da cidade", sinalou.
A cesión gratuíta das instalacións municipais ten como obxectivo facilitar o funcionamento das escolas, reducir as barreiras de acceso á actividade física e apoiar o labor formativo que realizan os clubs lucenses coas categorías de base.
Neste sentido, desde a Concellería de Deportes lembran que serán os propios clubs e entidades os encargados de ofrecer a información específica de cada escola, incluíndo as modalidades deportivas, os horarios, as idades dos participantes, as prazas dispoñibles e as condicións de inscrición.
Carballo incidiu na importancia de continuar traballando conxuntamente coas entidades deportivas para ampliar as oportunidades de acceso ao deporte entre a infancia e a mocidade. "Queremos que cada vez máis nenos e nenas atopen en Lugo unha disciplina coa que desfrutar, aprender e adquirir os valores que transmite o deporte. Para iso é fundamental seguir traballando da man dos clubs, que son unha peza esencial do deporte lucense", concluíu.