A segunda edición de “Diez Razones” terá lugar o 15 de maio no Círculo das Artes de Lugo
O vindeiro venres 15 de maio, o Círculo de las Artes de Lugo será o escenario da segunda edición de 'Diez Razones', unha cita que combina gastronomía e solidariedade cun marcado carácter benéfico.
O evento, que se celebrará ás 21:00 horas no Salón Regio, reunirá a persoas comprometidas cunha causa social que nesta ocasión centrará os seus esforzos en iniciativas vinculadas á saúde e ao benestar.
Toda a recadación obtida destinarase ao proxecto “Murallalandia”, un proxecto para a creación dun parque infantil na zona de Pediatría do Hospital Universitario Lucus Augusti impulsado pola Área de Humanización do HULA, que traballa na creación dun espazo lúdico e de aprendizaxe situado nun recinto exterior xunto á ala de Pediatría, cuberto e con elementos de xogo inspirados na Muralla e no patrimonio cultural da cidade. Trátase dunha zona concibida para favorecer a recuperación física e emocional dos nenos e nenas hospitalizados, reforzar o vínculo coa cultura local e impulsar un modelo de atención humanizada, inclusiva e sostible; así como á iniciativa “Menos soidade, máis vida” de Alume Saúde Mental, orientada a mellorar a calidade de vida das persoas a través do acompañamento e a intervención social.
A gala propón unha experiencia na que a alta gastronomía serve como vehículo para fomentar a solidariedade, reunindo a profesionais e asistentes arredor dunha causa común. Ademais, o evento conta coa colaboración de diversas entidades e patrocinadores que contribúen á súa organización.
A organización agarda repetir o éxito da primeira edición e consolidar esta iniciativa como unha cita anual de referencia en Lugo, na que a implicación social e a cultura gastronómica van da man.